Մեզ փոխանցված ադրբեջանական առաջարկներում մեծ հաշվով անընդունելի ոչինչ չկա. Արարատ Միրզոյան
Արտաքին Քաղաքական«Մեր ընկալումն այն է, որ, ըստ էության, մարտի 10-ին մեզ փոխանցված ադրբեջանական առաջարկներում մեծ հաշվով անընդունելի ոչինչ չկա։ Այլ բան, որ այդ առաջարկներն ամբողջապես չեն հասցեագրում Հայաստան-Ադրբեջան համապարփակ խաղաղության հնարավոր օրակարգը»,-ԱԺ արտաքին հարաբերությունների հանձնաժողովի նիստի ընթացքում հայտարարեց Արարատ Միրզոյանը՝ պատասխանելով «Հայաստան» խմբակցության պատգամավոր Գեղամ Նազարյանի հարցին, թե՝ «Ադրբեջանի ԱԳՆ կողմից ՀՀ-ին ներկայացված 5 առաջարկություններին ՀՀ արձագանքն ինչպիսի՞ն է, ընդունե՞լ եք, կիսո՞ւմ եք այդ 5 նախապայմանները»։
Միրզոյանի խոսքով, իրենց պատասխաններում առանցքային և սկզբունքային են համարում Լեռնային Ղարաբաղի հայության իրավունքները և ԼՂ կարգավիճակի հարցի հասցեագրումը։
«Այս ամբողջական հենքի վրա մենք պատրաստ ենք սկսել բանակցություններ»,- ասաց նա։
Արարատ Միրզոյանը նշեց, որ հենց այս առաջարկով էլ դիմել են ԵԱՀԿ Մինսկի խմբի համանախագահությանը՝ կազմակերպելու խաղաղության պայմանագրի շուրջ բանակցություններ՝ հիմք ընդունելով ՄԱԿ կանոնադրությունը, Քաղաքական և քաղաքացիական իրավունքների միջազգային դաշնագիրը և Հելսինկյան եզրափակիչ ակտը։