Թուրքական իշխանությունները խորհրդարանից պահանջում են միջսահմանային ռազմական գործողություններ իրականացնելու թույլտվություն

Թուրքիայի կառավարությունը հարցում է ուղարկել խորհրդարան՝ Սիրիայի հետ միջսահմանային ռազմական գործողություններ իրականցնելու թույլտվություն ստանալու համար:

Հարցի քննարկումը պլանավորված է այս հինգշաբթի. հայտնում են տեղական ԶԼՄ-ները:

Երկրի իշխող կուսակցությունը, որը ղեկավարում է վարչապետ Էրդողանը, Սիրիայի հարցով խորհրդարանի հատուկ նիստ է հրավիրել՝ կապված նախօրեին սիրիական կողմից Թուրքիայի հարավարևելյան սահմանային հատվածների հրետակոծության հետ, ինչի արդյունքում զոհվել է 5 մարդ, ևս 9-ը վիրավորվել են:

Նախարարների խորհուրդը նիստին նաև հայտ է ներկայացրել թուրքական բանակին Սիրիայի նկատմամբ միջսահմանային գործողություններ իրականացնելու թույլտվության լիազորություններ տալու վերաբերյալ:

Նախարարների խորհուրդը հոկտեմբերի 4-ին քննարկելու էր Հյուսիսային Իրաքում ռազմական գործողությունների իրականացման լիազորությունների երկարաձգման հարցը: Թուրքական բանակը պարբերաբար ռազմական գործողություններ է իրականացնում Հյուսիսային Իրաքում, ուր տեղակայված են Քուրդիստանի աշխատավորական կուսակցության անջատողական ջոկատները:

Սիրիայի հարցով ռազմական գործողությունների թույլտվության մասին հայտը մեջլիս է ներկայացվել հինգշաբթի գիշերը. հայտնում է NTV հեռուստաընկերությունը:

«Սիրիայում շարունակվող ճգնաժամը սպառնում է ինչպես տարածաշրջանային անվտանգությանն ու կայունությանը, այնպես էլ՝ Թուրքիայի ազգային անվտանգությանը». ասվում է փաստաթղթում, որի մեջ սիրիական գործողությունները որակվում են «ագրեսիվ և Թուրքիայի տարածքային ամբողջականությանը սպառնացող»:

«Ստեղծված իրավիճակը հասել է զարգացմասն այն փուլին, որն արդեն սպառնում է Թուրքիայի ազգային անվտանգությանը: Այդ կապակցությամբ անհրաժեշտություն է առաջանում միջոցներ ձեռնարկել սպառնալիքների դեմ: Խորհրդարանին ուղղված հայտում ընդգծված է թուրքական ռազմական ուժերի՝ երկրի սահմաններից դուրս գործելու թույլտվության մանդատ տրամադրելու անհրաժեշտությունը»,-ասված է այդ փաստաթղթում:

Սահմանադրության համաձայն՝ Թուրքիայի սահմաններից դուրս ռազմական գործողությունների իրականացման թույլտվություն կարող է տալ միայն երկրի խորհրդարանը: