Times Higher Education. Աշխարհի 400 լավագույն համալսարանները

Բրիտանական Times Higher Education պարբերականը Thomson Reuters գործակալության հետ համատեղ կազմել է Times Higher Education World University Rankings վարկածով աշխարհի 200 լավագույն համալսարանների վարկանշային ցուցակը։ Ընդհանուր առմամբ, ցուցակում  ներգրավված է 400 համալսարան։ Ամբողջական ցուցակին կարելի է ծանոթանալ այստեղ։

Վարկանշային ցուցակում առաջին տեղը զբաղեցնում է Կալիֆորնիայի տեխնիկական ինստիտուտը։ Հարվարդի համալսարանը, որ վերջին տարիներին գլխավորում էր ցուցակը, հայտնվել է չորրորդ տեղում։ Երկրորդ տեղը զբաղեցնում է Սթենֆորդը, երրորդը՝ Օքսֆորդը։ Հինգերորդ հորիզոնականում է Մասաչուսեթսի տեխնոլոգիական ինստիտուտը։

Ամերիկյան համալսարանների նման ցուցակում մեծ թիվ են կազմում նաև բրիտանական համալսարանները։ Բարձր հորիզոնականում է հայտնվել Շվեյցարիայի Դաշնային տեխնոլոգիական համալսարանը Ցյուրիխում՝ 12-րդ տեղ։ Ասիական համալսարաններից լավագույնն է համարվել Տոկիոյի համալսարանը՝ 27-րդ տեղ, առաջընթաց են գրանցել նաև չինական բարձրագույն կրթական հաստատությունները՝ Պեկինի համալսարանը՝ 49-րդ տեղ, Սինհուայի համալսարանը՝ 52-րդ տեղ։

Ռուսաստանից լավագույն ներկայացուցիչ է համարվել Լոմոնոսովի անվան Մոսկվայի պետական համալսարանը՝ 216-րդ տեղը։

Նշենք, որ վարկանշային ցուցակում չեն հայտնվում այն ԲՈՒՀ-երը, որոնք զբաղվում են հատուկ հետազոտություններով, ինչպես նաև այն համալսարանները, որոնք հրապարակում են չափազանց քիչ գիտական աշխատանքներ։ Ցուցակը կազմելիս հաշվի է առնվում 13 ցուցանիշ, որոնցից յուրաքանչյուրն իր ներդրումն ունի վերջնական գնահատականի տրման հարցում։