Նյույորքյան դատարանը «Ալ Քաիդայից», «Թալիբանից» և Իրանից 6 մլրդ դոլար փոխհատուցում է պահանջել

Ահաբեկչական «Ալ Քաիդա» կազմակերպությունը, աֆղանական «Թալիբան» խմբավորումը և Իրանի Իսլամական Հանրապետությունը պետք է 6 միլիարդ դոլարի չափով փոխհատուցում վճարեն 2001 թվականի սեպտեմբերի 11-ի ահաբեկչության զոհերի հարազատներին. հայտնում է Взгляд-ը։ Նման վճիռ է կայացրել չորեքշաբթի նյույորքյան դատավոր Ջորջ Դենիելսը։

Այս որոշումը պարզորոշ խորհրդանշական բնույթ ունի, քանի որ դատարանն այդ միջոցները բռնագանձելու հնարավորություն չունի։
Անցյալ տարի Դենիելսը հեռակա կարգով վճիռ կայացրեց՝ հօգուտ դատարան դիմած 47 զոհերի ընտանիքների անդամների՝ մեղավոր ճանաչելով «Ալ Քաիդային», «Թալիբանին» և Իրանի Իսլամական Հանրապետությանը ահաբեկչությունների կազմակերպման համար։ Դրանց արդյունքում զոհվեց շուրջ 3000 մարդ։

«Ալ Քաիդայի» ղեկավար Ուսամա բեն Լադենն անմիջապես իր վրա վերցրեց ահաբեկչությունների պատասխանատվությունը, և այդ ժամանակ Աֆղանստանում իշխող թալիբները ապաստան էին տրամադրում այդ կազմակերպության անդամներին։

Իրանական իշխանությունները իրենց հերթին  բազմիցս հայտարարել են, որ կապ չունեն սեպտեմբերի 11-ի իրադարձությունների հետ։ Այնուհանդերձ, Նյու Յորքի դատարանը վճռեց, որ Թեհրանը ահաբեկիչներին աջակցություն է ցույց տվել և պետք է վճարի փոխհատուցումը։