Մեր կենդանական աշխարհը մեր հարստությունն է. Արամ Հարությունյան

ՀՀ բնապահապանության նախարար Արամ Հարությունյանն այսօր կենդանիների պաշտպանության միջազգային օրվա առիթով Բնության պետական թանգարանում բաց դաս է անցկացրել Երևանի Աղասի Խանջյանի համար 53 հիմնական դպրոցի աշակերտների հետ: Նախարարը, շնորհավորելով աշակերտներին, ընդգծել է Հայաստանում կենդանիների պաշտպանության դերն ու նշանակությունը և այդ ուղղությամբ տարվող աշխատանքները:

Նախարարի խոսքով՝ օրը հրաշալի առիթ է խնդիրների մասին խոսելու և սկիզբ դնելու բնության պահպանության ու կենդանական աշխարհի մասին գիտական հետազոտություններով զբաղվելուն: Նա մասնավորապես նշել է. «Մեր կենդանական աշխարհը մեր հարստությունն է: Մենք պետք է դառնանք մեր բնության ու կենդանական աշխարհի պաշտպանները: Այս ամենը, անհրաժեշտ է սկսել մեր անձնական օրինակով»: Աշակերտները նախարարին առաջարկեցին միասին այցելել հատուկ պահպանվող տարածքներից որևէ մեկը: Նախարարը խոստացավ առաջիկայում կազմակերպել նրանց այցելությունը: Միջոցառման ավարտին երեխաները նախարարի կողմից ստացել են խորհրդանշական գրքեր բնության պահպանության վերաբերյալ: Թանգարանի գիտաշխատողների ուղեկցությամբ աշակերտները շրջեցին բնության թանգարանում ծանոթացան ցուցադրությանը:

Կենդանիների պաշտպանության միջազգային օրը առաջին անգամ նշվել է Իտալիայի Ֆլորենցիա քաղաքում 1931 թվականին, բնության պահպանության կողմնակիցների Միջազգային կոնգրեսի ժամանակ: Կոնգրեսում ներկայացված երկրների պատվիրակները և բազմաթիվ հասարակական կազմակերպություններ իրենց պատրաստակամությունը հայտնեցին ամեն տարի նշելու այդ օրը:

Հայաստանը 2008թ. միացել է այս գործընթացին և յուրաքանչյուր տարի նշում է կենդանիների պաշտպանության միջազգային օրը: