ՄԹ Համայնքների պալատի՝ Հայաստանի հետ բարեկամական խումբը դատապարտել է Ադրբեջանի ագրեսիան Լեռնային Ղարաբաղի դեմ

Միացյալ Թագավորության Համայնքների պալատի՝ Հայաստանի հետ բարեկամական խումբը հայտարարություն է տարածել՝ դատապարտելով Ադրբեջանի ագրեսիան Լեռնային Ղարաբաղի դեմ։ Հայտարարությունը հրապարակել է Պալատի պատգամավոր Թիմ Լոութենը։

«Մենք խստորեն դատապարտում ենք ադրբեջանական ուժերի ագրեսիվ գործողությունները Լեռնային Ղարաբաղի դեմ։ Արցախյան տարածքների ուղղությամբ ադրբեջանական բանակի առաջխաղացումը եւ հարձակողական ռազմական գործողությունները, հատկապես Փառուխի եւ Խրամորթի շրջանում, չարդարացված են եւ ռազմատենչ։ Տեղի բնակչության հասցեին տարածքը լքելու պահանջները, անօդաչու թռչող սարքերի օգտագործումը եւ Լեռնային Ղարաբաղի գազամատակարարման խափանումը թշնամական գործողություններ են խաղաղ բնակչության դեմ եւ սպառնում են նրանց կյանքին։

Ադրբեջանական ուժերը՝ համաձայն 2020թ․ նոյեմբերի հրադադարի հայտարարության, պետք է վերադառնան իրենց սկզբնական դիրքերը՝ թույլ տալով վերականգնել գազամատակարարումը։

Սա հրադադարի ռեժիմի հերթական կոպտագույն խախտումն է։ Ակնհայտ է, որ Ադրբեջանի իշխանությունը փորձում է օգտվել Ուկրաինայի անկայուն իրավիճակից, փորձում է վերադառնալ իր տարածքային անհիմն պահանջներին՝ անկախ նախկին պարտավորություններից։

Մենք կոչ ենք անում Ադրբեջանի կառավարությանը այս խնդրի խաղաղ լուծումը փնտրել դիվանագիտական ​​ճանապարհով, ոչ թե ռազմական հարձակման միջոցով։

Բացի այդ, մենք կոչ ենք անում Միացյալ Թագավորության կառավարությանը միանալ արեւմտյան այլ ժողովրդավարություններին՝ դատապարտելու ադրբեջանական ռեժիմի ռազմատենչ գործողությունները, եւ օգտագործելով դիվանագիտական ​​բոլոր ճնշումները՝ ստիպելու նախագահ Ալիեւին վերադառնալ բանակցային սեղանի շուրջ՝ որպես ԵԱՀԿ Մինսկի խմբի խաղաղ գործընթացի մաս»,- գրել է Լոութենը։