Ստանիսլավսկում կբեմադրվի Դովլաթովի «Աբանամատ» ներկայացումը

ՀՀ մշակույթի նախարարության աջակցությամբ` պետական պատվերի շրջանակներում, դեկտեմբերի 16-17-ին Կ. Ստանիսլավսկու անվան պետական ռուսական դրամատիկական թատրոնում, հանդիսատեսի դատին կհանձնվի հայտնի գրող Սերգեյ Դովլաթովի պատմվածքների հիման վրա ստեղծված «Աբանամատ» ներկայացումը:

Պիեսի բեմականացման հեղինակներն են Ալեքսանդր Գրիգորյանն ու միջազգայնագետ Կոնստանտին Բալայանն, ով երկար տարիներ ուսումնասիրել է արձակագրի ստեղծագործական կյանքն ու գործունեությունը:

«Աբանամատ» ներկայացման հիմքում ընկած են Ս. Դովլաթովի «Зона», «Соло на ундервуде», «Заповедник», «Новый американец», «Армянские мотивы» և այլ պատմվածքներ, որոնք լի են նուրբ հումորով, զվարճալի, երբեմն էլ թախծալի իրավիճակներով: Օգտագործված են հեղինակի օրագրերերում առկա նոթերն ու գրառումները:

«Աբանամատ» ներկայացման ռեժիսորն է Իրա Հարությունյանը (ՀՀ վաստակավոր արտիստ), բեմանկարիչ՝ Ստեփան Զոհրաբյան (ՌԴ արվեստի վաստակավոր գործիչ), երաժշտական ձևավորումը` Մարտին Վարդազարյանի (ՀՀ արվեստի վաստակավոր գործիչ), պարերի բեմադրիչ` Նունե Կիրակոսյանը:

Գլխավոր դերում հանդես է գալիս ՀՀ վաստկավոր արտիստ Ֆրեդերիկ Դավթյանը: Ներկայացման մեջ ընգրկված են թատրոնի գրեթե ողջ դերասանական անձնակազմը:

Այսօր, Կ. Ստանիսլավսկու անվան ռուսական դրամատիկական թատրոնում, «Աբանամատ» ներկայացման առաջնախաղին նվիրված ասուլիսին մասնակցում էին ՀՀ մշակույթի նախարարության աշխատակազմի ժամանակակից արվեստի վարչության գլխավոր մասնագետ Վարդան Գրիգորյանը, Կ. Ստանիսլավսկու անվան պետական ռուսական դրամատիկական թատրոնի գեղ. ղեկավար Ալեքսանդր Գրիգորյանը, Ստեփան Զոհրաբյանը: