Հայաստանյան թանգարանների աշխատակիցները կարող են վերապատրաստվել

Հայաստանի Հանրապետության մշակույթի և Իտալիայի արտաքին գործերի նախարարությունների միջև մշակութային ժառանգության պահպանման, ուսումնասիրության և վերականգնման բնագավառում իրականացվող համագործակցային ծրագրի շրջանակում ս. թ. հոկտեմբերի 4-9-ը Երևանում անցկացվում է ուսուցողական դասընթացներ՝ «Թանգարանագիտություն և թանգարանային ցուցադրություն» թեմայով: Դասընթացի կազմակերպիչներն են ՀՀ մշակույթի նախարարությունը, Միլանի Պոլիտեխնիկական ինստիտուտը, համաֆինանսավորում են Միլանի Պոլիտեխնիկը և «Կրթական ծրագիր Հայաստանում՝ վերականգնման ոլորտում» միջազգային համագործակցության ծրագիրը: Դասընթացը կվարի թանգարանագետ, Միլանի Պոլիտեխնիկի պրոֆեսոր Ֆուլվիա Պրեմոլին:

Վերապատրաստման դասընթացների նպատակն է Հայաստանի թանգարանային ոլորտի մասնագետներին օգնել ստանալու հիմնարար գիտելիքներ՝ թանգարանային գործում արդի մոտեցումների և թանգարանների կառավարման նոր մեթոդների վերաբերյալ: Ծրագրին կարող են մասնակցել թանգարանային տարբեր աշխատողներ՝ կառավարիչներ, գիտաշխատողներ, ցուցանմուշների պահապաններ, մարկետինգի պատասխանատուներ և այլն: Դասընթացի շրջանակներում թանգարանային փորձագետը կանդրադառնա ժամանակակից թանգարանների պրոֆիլին, կառուցվածքին, ցուցադրության կազմակերպման և մեկնաբանման արդի եղանակներին, նոր տեխնոլոգիաների ներդրմանը թանգարաններում, ինչպես նաև LIGHT DESIGN-Ի չափանիշներին: Դասընթացները կանցկացվեն ինտերակտիվ միջավայրում ներառելով նաև գործնական աշխատանքներ: Առաջադիմությամբ աչքի ընկող մասնակիցները դասընթացի ավարտին կխրախուսվեն Միլանի Պոլիտեխնիկի կողմից տրված վկայականով: Դասընթացն անվճար է:

Ուսուցողական դասընթացի հանդիսավոր բացումը տեղի կունենա հոկտեմբերի 4-ին, ժամը 14:00-ին, Ալ. Սպենդիարյանի տուն-թանգարանում: