Երբ իմանաք, որ կառավարությունը վարձով սենյակներ է տալիս, ձե՛ն հանեք

Պետական գույքի կառավարման վարչությունը պարզաբանում ներկայացրեց ԱԳՆ-ի շենքի վաճառքի կապակցությամբ, որում նշվում էր, որ շենքը վաճառքի է հանվել, քանի որ շենքի նկատմամբ տարիներ շարունակ հետաքրքրություն է եղել՝ հատկապես տարբեր ժամանակահատվածներում առանձնացված տարածքների մասնավորեցումից հետո, ինչպես նաև 1951 և 1955 թվականներին երկու փուլով շահագործման հանձնված կառույցի շենքային պայմանները վաղուց արդեն այնտեղ տեղակայված նախարարությունների և հատկապես ԱԳՆ ժամանակակից պահանջները չեն բավարարել: Բացի այդ` տարածքներով ապահովված չեն Սփյուռքի նախարարությունը, Արդարադատության նախարարությունը: Այդ իսկ պատճառով կառավարությունում բազմիցս քննարկումներ են եղել նախարարություններին պատշաճ տարածքներով ապահովելու հարցի շուրջ:

Փաստորեն պարզվում է, որ Կառավարության որոշումների կայացման մեխանիզմն ամբողջովին աշխատում է շուկայական հարաբերությունների տրամաբանության մեջ: Էլ ինչո՞ւ ենք մենք դժգոհում կառավարության և առհասարակ իշխանությունների վարած տնտեսական քաղաքականությունից: Բավականին նորմալ քաղաքականություն է տարվում. կա պահանջարկ և այն էլ տարիներ շարունակ իր մուրազին սպասող պահանջարկ, հետևաբար այն պիտի բավարարվի առաջարկի տեսքով: Եթե այս ամենին ավելացնենք այն, որ Սփյուռքի և Արդարադատության նախարարությունները տարածքներով ապահովված չեն, ապա իդեալական լուծում է. եթե մի քանի նախարարություն չունի տարածք, ապա արդարությունը վերականգնելու համար բոլորն էլ չպիտի ունենան: Փաստորեն արդարացի չէին մեր բոլոր դժգոհությունները, որ, օրինակ, Սփյուռքի նախարարությունը լավ չի աշխատում. ասում էինք սիրիահայերին անտեր է թողել: Ի՞նչ անեին այս խեղճերը, եթե իրենք էլ տարածք չունեին: Այ արտգործնախարարությունը տարածք էլ ուներ, նորմալ աշխատում էլ էր: Նորմա՞լ էր աշխատում: Ներողություն եմ խնդրում սխալ դիտարկման համար: Իսկ ինչի՞ արդյունքում տեղի ունեցավ Սաֆարովի արտահանձնումը, եթե ԱԳՆ-ն աշխատում էր: Պատասխանը միանշանակ պարզ է. շենքային պայմանները ԱԳՆ ժամանակակից պահանջները չեն բավարարել: Հենց այստեղ է թաղված շան գլուխը. ԱԳՆ-ի շենքում հնարավոր չի եղել անցկացնել ինտերնետային կապ, անգամ ֆաքս ու հեռախոս, իսկ փոստատարը հարկ չի համարել մտնել այդ ժամանակակից պահանջներին չբավարարող շենք, այս մարդիկ էլ հո պայծառատե՞ս չեն, որ իմանային, թե բարեկամական երկիր Հունգարիան ինչ դավեր է նյութում մեր մեջքի հետևում: Այ եթե խոսենք Բնապահպանության նախարարության մասին, որը ունի նորմալ շենքային պայմաններ, հաստատ թերացումներ չենք արձանագրի: Թերացումներ չե՞նք տեսնի: Ների՛ր իմ սիրելի ընթերցող՝ գիշերվա կեսին այսպիսի անիմաստ արտահայտություններ անելու համար, երևի հոգնած եմ: Իսկ օրեցօր բացվող հանքե՞րը, Թեղո՞ւտը,Ամուլսա՞րը, վերջապես Այծ Բեզոարյանի սպանության գործը: ԷԷԷԷ, հաստատ հոգնել եմ, մոռացել էի, որ բնապահպանության նախարարլ արդեն ուղղվել է ու դասախոսություններ է կարդում երեխաների համար, մեկ էլ, քանի որ Հայաստանում չկան նորմալ որս անելու պայմաններխ մեկ-մեկ որսորդություն, ավելի ճիշտ, ձկնորսություն է անում արտասահմանում: Սիրելի՛ ընթերցող, երդվում եմ մեր կառավարության անբիծ վարքով, որ ուղղակի հոգնած եմ, այլ ոչ թե դրսի մութ ու ցուրտ ուժերի կողմից հովանավորվող, այս պետության հիմքերը խարխլել ցանկացող գրանտակեր:

Այս ամենից կարող ենք հետևություն անել, որ մեր նախարարություններին լավ աշխատելու համար պակասում են միայն ժամանակակից պահանջներին բավարարող շենքային պայմանները:

Պետական գույքի կառավարման վարչության կողմից նշվում է նաև, որ գնի մի մասի դիմաց գնորդը պարտավորվում է մինչև 2015 թվականի սեպտեմբերի 1-ը պետությանը հանձնել Հայաստանի Հանրապետության կառավարության 2012 թվականի հուլիսի 19-ի N916-Ա որոշմամբ օտարվող գույքի սեփականատեր և գնորդի դուստր հանդիսացող «Սալսա Դիվելոփմենթ» փակ բաժնետիրական ընկերության 100 տոկոս բաժնետոմսերը` անվանական արժեքով, որի հաշվեկշռում կլինի ք.Երևան Վ.Սարգսյան 3 հասցեում գտնվող 0.5081 հա հողամասը՝ նոր կառուցված շենքով:

Փաստորեն 2015 թվականին մեր նախարարությունները կունենան նոր շենքային պայմաններ, ու համոզված եմ, որ մենք կգրանցենք եռանիշ տնտեսական աճ, իսկ մինչ այդ պետք է հարմարվենք ներկայիս իրավիճակին և նախարարությունների համար վարձով գրասենյակներ փնտրենք:

Իմիջիայլոց, քիչ առաջ պարզ դարձավ, որ նրանից հետո, երբ Սերժ Սարգսյանը հայտարարեց, որ այնպիսի մարդու հետ, որ այդ տեսակ արգահատելի վերաբերմունք ունի ջութակի նման ազնվագույն գործիքի նկատմամբ, ճամփա չի գնա, Ռուբեն Հայրապետյանը համաձայնել է Հարսնաքարի շենքը մինչև 2015 թվականը տրամադրել Արդարադատության և Արտաքին գործերի նախարարություններին:

Վերջում մի խնդրանք. երբ իմանաք, որ կառավարությունը վարձով սենյակներ է տալիս, ձե՛ն հանեք:

Գրանտակեր Հակապետականյան