Խաղաղության պայմանագրի նախապատրաստման համար ադրբեջանա-հայկական աշխատանքային խմբերը կձևավորվեն մինչև ապրիլի վերջ. Ալիև

Տարածաշրջանային հարթակի երկրորդ հանդիպումը «3+3» ձևաչափով (Ադրբեջան, Հայաստան, Վրաստան, Թուրքիա, Ռուսաստան և Իրան) տեղի կունենա մոտ ապագայում, հայտարարել է Ադրբեջանի նախագահ Իլհամ Ալիևը։

«Մենք պլաններ ունենք 3+3 ձևաչափով երկրորդ հանդիպման օրակարգի համար (առաջին հանդիպումը կայացել է 2021թ. դեկտեմբերին փոխարտգործնախարարների մակարդակով), հանդիպումը պետք է կայանա մոտ ապագայում, պետք չէ ժամանակ կորցնել»,- երեքշաբթի ասել է Ալիեւը՝ այս տարվա առաջին եռամսյակի արդյունքներին նվիրված հանդիպման ժամանակ։

Նա նշել է, որ այս հարթակի շրջանակներում անհրաժեշտ է հասնել կոնկրետ արդյունքների, այլապես, ըստ Ալիեւի, այն կկորցնի իր նշանակությունը։

«Մենք իրական արդյունքների կողմնակիցներ ենք: Մենք շատ հստակ պատկերացում ունենք տարածաշրջանի ապագա զարգացման մասին (Հարավային Կովկաս): Մենք գիտենք, թե ինչ ենք ուզում և կշարունակենք օգտագործել բոլոր հնարավորությունները մեր նպատակներին հասնելու համար»,- ասել է նախագահը: 

Նա հայտարարել է, որ այժմ գլխավոր խնդիրը Ադրբեջանի և Հայաստանի միջև հարաբերությունների կարգավորումն է:

Ալիևի խոսքով` Հայաստանը դրական է արձագանքել հարաբերությունների կարգավորման հինգ հիմնարար սկզբունքներին։

«Եթե Երեւանն ընդունում է այս հինգ սկզբունքները, դա նշանակում է, որ Հայաստանը հրաժարվում է Ադրբեջանի նկատմամբ տարածքային պահանջներից»,- ընդգծել է նա։

Երկրի ղեկավարը նաև նշել է, որ խաղաղության պայմանագրի նախապատրաստման և սահմանների դելիմիտացիայի համար ադրբեջանա-հայկական աշխատանքային խմբերը կձևավորվեն մինչև ապրիլի վերջ և պետք է հնարավորինս շուտ սկսեն աշխատանքը։

Միաժամանակ Ալիևը սպառնացել է`«եթե Հայաստանում կրկին միջոցներ հատկացվեն սպառազինության համար, ապա Բաքուն այդ գործողությունները կդիտարկի որպես ոչ բարեկամական և համապատասխան միջոցներ կձեռնարկի»։