ՀՀ դեսպանը հանդիպումներ է ունեցել Չեխիայի Հանրապետության Պառլամենտի Սենատում

Դեկտեմբերի 14-ին Չեխիայի Հանրապետությունում ՀՀ դեսպան Տիգրան Սեյրանյանը հանդիպեց Չեխիայի Հանրապետության Պառլամենտի Սենատի նախագահ Միլան Շտեխի (Milan Štĕch) հետ:

Վերջինս դեսպան Սեյրանյանին շնորհավորեց Չեխիայի Հանրապետությունում իր պարտականությունները ստանձնելու կապակցությամբ և համոզմունք հայտնեց, որ Պրահայում ՀՀ դեսպանության բացումը կարևոր խթան կհանդիսանա երկկողմ բարեկամական հարաբերությունների զարգացման համար:

Հանդիպման ընթացքում քննարկվեց հայ-չեխական՝ քաղաքական և տնտեսական երկկողմ հարաբերությունների զարգացմանն առնչվող հարցերի լայն շրջանակ։

Դեսպան Սեյրանյանը, զրուցակցի խնդրանքով, ներկայացրեց արցախյան հիմնախնդրի կարգավորման գործընթացի վերջին զարգացումները՝ նշելով, որ Հայաստանը հավատարիմ է մնում հիմնահարցի բացառապես խաղաղ կարգավորմանը:

Հանդիպմանը Հայաստանի դեսպանը զրուցակցին տեղեկացրեց Հայաստան-Եվրամիություն ասոցացման համաձայնագրի նախագծի շուրջ բանակցությունների գործընթացի, ինչպես նաև առաջիկա ծրագրերի մասին:

Չեխիայի Սենատում դեսպան Սեյրանյանը հանդիպումներ է անցկացրել նաև սենատորներ Յարոմիր Շտետինայի, Պետր Բրատսկու և Յան Հորնիկի հետ: