Թուրքիան սպառնում է հետ կանչել Ֆրանսիայում իր դեսպանին

Ինչպես հաղորդում է թուրքական "Hurriyet Daily News"-ը՝ Թուրքիան սպառնում է հետ կանչել Ֆրանսիայում իր դեսպանին, եթե Ֆրանսիայի խորհրդարանի ստորին պալատը դեկտեմբերի 22–ին հաստատի Հայոց ցեղասպանությունը մերժողներին քրեական պատասխանատվության  ենթարկելու մասին օրինագիծը։

«Երկկողմ հարաբերությունների բոլոր ոլորտներում լինելու են անդառնալի հետեւանքներ՝ սկսած մեր դեսպանի վաղաժամկետ հետկանչից, եթե դեկտեմբերի 22–ին Ֆրանսիայի խորհրդարանն ընդունի այդ օրինագիծը», - ասել է Ֆրանսիայում Թուրքիայի դեսպանության մամլո քարտուղար Էնգին Սոլաքօղլուն։

Նշենք, որ Ֆրանսիայի իշխող «Ժողովրդական շարժման միություն» (UMP) կուսակցության պատգամավորները, որոնք Ֆրանսիայի խորհրդարանում մեծամասնություն են կազմում, դեկտեմբերի 8–ին խորհրդարանի օրակարգ են մտցրել Հայոց ցեղասպանությունը ժխտողներին քրեական պատասխանատվության ենթարկելու մասին օրինագիծը, որի քննարկումը նախատեսված է  դեկտեմբերի 22-ին։