Der Standard. Թուրքիայի խորհրդարանը թույլ է տվել Սիրիայի դեմ ռազմական գործողություններ սկսել

Թուրքիայի խորհրդարանը ձայների մեծամասնությամբ կողմ է քվեարկել միջսահմանային ռազմական գործողություններ իրականացնելուն: Դրան ի պատասխան`Սիրիան ներողություն է խնդրել Թուրքիայից սահմանային միջադեպի համար:

Սիրիայում քաղաքացիական պատերազմը սպառնում է վերածվել միջազգային կոնֆլիկտի` ՆԱՏՕ-ի անդամ հանդիսացող Թուրքիայի հետ սահմանային բախումների պատճառով:

Թուրք զինվորականները ռազմական գործողություններ են սկսել հինգշաբթի օրը՝ հակահարված տալով թուրք-սիրիական սահմանային գոտում գտնվող սիրիական զինված ուժերին:

Այդ ընթացքում թուրքական խորհրդարանը կանաչ լույս ցույց տվեց հարևան Սիրիայի հետ ռազմական գործողություններ սկսելու համար: Ի հեճուկս ընդդիմության դեմ լինելուն(«Արդարութուն և զարգացում կուսակցությունը», «Դեմոկրատական կուսակցության», «Հանրապետական ժողովուրդների կուսակցության»)՝ խորհրդարանը ձայների մեծամասնությամբ ընդունեց օրենքի նախագիծը, որը թույլ է տալիս Թուրքիային առաջիկա մեկ տարվա ընթացքում ռազմական գործողություններ իրականացնել Թուրքիայի սահմաններից դուրս:

Կառավարությունը նախագիծը քննարկման է ներկայացրել արտահերթ կարգով՝ պայմանավորված չորեքշաբթի օրը սիրիական զինված ուժերի կողմից Աքչաքալ սահմանային քաղաքի վրա կազմակերպած հրետակոծությամբ, որի արդյունքում զոհվել էր մի թուրք կին և նրա չորս երեխաները:

Թուրքիան հինգշաբթի հայտարարել էր, որ պատերազմ չի ցանկանում սկսել իր հարևան Սիրիայի հետ, սակայն նրա գործողությունները սահմանին արդեն սպառնում են Թուրքիայի ազգային անվտանգությանը:

Ընդդիմությունն իր հերթին քննադատել է խորհրդարանի այդ որոշումը: Անկարայում Սիրիայի դեմ ուղղված այդ օրինագծի դեմ բողոքի ցույցեր են կազմակերպվել կառավարության շենքի դիմաց: Ոստիկանությունը ցուցարարներին ցրելու համար արցունքաբեր գազ է կիրառել:

Նշենք նաև, որ 449 պատգամավորներից 320-ն է քվեարկել հօգուտ առաջարկության, 129-ը`դեմ: