Մենք ցանկանում ենք՝ դելիմիտացիայի հարցերով հանձնաժողովում ընդգրկել նաև Ռուսաստանին և Բրյուսելին. ԱԽ քարտուղար

Դեռեւս մեկ օր կա ապրիլի վերջի համար, եւ կարծում եմ` մինչեւ այդ ժամանակը մենք կունենանք հայտարարություն: Այս մասին «Ազատություն» ռադիոկայանին տված հարցազրույցում ասել է Անվտանգության խորհրդի քարտուղար Արմեն Գրիգորյանն՝ անդրադառնալով դիտարկմանը, որ ըստ բրյուսելյան պայմանավորվածությունների՝ մինչեւ ապրիլի վերջին սահմանների դելիմիտացիայի հարցերով հանձնաժողով պետք է ստեղծվեր։

Հարցին, թե ի՞նչ ձեւաչափ է ունենալու այդ հանձնաժողովը եւ ովքե՞ր են այնտեղ ընդգրկվելու, ԱԽ քարտուղարն ասել է.

«Տարբեր պետական ինստիտուտներ, որոնք որեւիցե ձեւով առնչություն ունեն դելիմիտացիայի եւ դեմարկացիայի գործընթացին, այսինքն` ԱԳՆ, ՊՆ, ԱԱԾ, նաեւ այլ ինստիտուտներ, որոնք եւ շահագրգռվածություն ունեն, եւ գիտելիք ունեն այս գործընթացի վերաբերյալ: Այս աշխատանքային խումբը երկկողմ աշխատանքային խումբ է: Մենք ցանկանում ենք նաեւ միջազգային հանրությանը, որպես գիտելիք ունեցող եւ նաեւ ինստիտուցիոնալ փաստաթղթեր կրող պետություններ, օգնություն ցուցաբերենք, որպեսզի դեմարկացիայի-դելիմիտացիայի գործընթացն անցնենք»։

Արմեն Գրիգորյանը պատասխանելով հարցին, թե միջազգային հանրություն ասելով նկատի ունի միա՞յն Ռուսաստանին, նշել է. «Ե՛վ Ռուսաստանին, եւ՛ Բրյուսելին, եւ՛ նաեւ եթե մենք տեսնենք` հավելյալ անհրաժեշտություններ ունենք, այլ քննարկումներ էլ կունենանք»։

Անվտանգության խորհրդի քարտուղարն ասել է, որ Հայաստանը պետք է շարունակի մտածել անվտանգության միջավայրի մասին, որովհետեւ դելիմիտացիայի գործընթացը շատ ծանր է։

«Նույնիսկ այնպիսի երկրների հետ, որոնց հետ ունենք շատ լավ հարաբերություններ, օրինակ` Վրաստանի հետ այս գործընթացը դեռեւս ավարտին չենք հասցրել, որովհետեւ կան մի շարք հարցեր, որոնց ո՛չ մենք ունենք այդ պատասխանը, ո՛չ Վրաստանը, կամ ունենք տարբեր մոտեցումներ: Եվ երկար տարիներ շարունակվում է այս գործընթացը, իսկ Ադրբեջանի հետ մեր հարաբերություններն ավելի բարդ են, եւ այդ առումով անհրաժեշտ է, որ կարողանանք այնպիսի միջավայր ապահովել, որպեսզի այդ բանակցություններում առաջընթաց չգրանցելը չազդի օրինակ` սահմանային իրավիճակի վրա»,– նշել է ԱԽ քարտուղարը։