«Առավոտ». Ինչո՞ւ էին ՀՀԿ-ականներից ոմանք «բացակայում»

«Առավոտը» ՀՀԿ խմբակցության ղեկավար Գալուստ Սահակյանից հետաքրքրվեց' Վարդան Օսկանյանին անձեռնմխելիությունից զրկելու միջնորդագրի քվեարկության ժամանակ ինչո՞վ էր պայմանավորված, որ Դուք պարբերաբար զանգեր էիք կատարում և ՀՀԿ պատգամավորներին «բերման ենթարկում» քվեարկության, Ձեզ պարբերաբար զեկուցում էին: Նա պատասխանեց. «Որևէ մեկը բերման չի ենթարկվել: Մենք լավ գիտեինք' ովքեր են բացակայում, նրանք, ովքեր գործուղումների մեջ էին' պիտի չլինեին, ովքեր հիվանդ էին' պիտի չլինեին: Ինչ որ սկզբում եղել է' մինչև վերջ էլ այդքանը ապահովել ենք: Իհարկե, դրա մեջ վատ բան չեմ տեսնամ: Եթե վտանգներ ենք տեսնում, բնականաբար, արժե համախմբել, բայց սա այդ դեպքը չէր»:

«Առավոտ»-ը նաև հետաքրքրվեց' համաձա՞յն եք Ձեր գործընկեր Համլետ Հարությունյանի այն դիտարկմանը 6 դեմ քվեարկած պատգամավորների առնչությամբ, որ «Գյուղ չկա, որ շուն չունենա»: Նա պատասխանեց. «Ես կարծում եմ, որ նա պատգամավոր է, և գնահատում եմ, որ մտահոգ է այդ տեսակետից: Բայց ես կարծում եմ, որ ռազմավարություններ կան, որ ոչ բոլորը կարող էին տեղյակ լինել: Ինձ համար ընդունելի չէ, որ դեմ են: Համենայնդեպս, մենք էլ մեր ռազմավարությունն ունեինք: Դա Հանրապետականին վայել չէ, որ ինչ-որ մեկը կարող է դեմ քվեարկել: Բայց նաև այստեղ խնդիրը այլ հարթության մեջ է: Շատ մի պեղեք, որովհետև պեղումներից չեմ կարծում, որ քաղաքականությունը շահում է»: