«168 Ժամ». «Քամին փչել է»

«Ակնհայտ է, որ արձանագրությունն անկախ յուրաքանչյուր պետության իրավունքների սահմանափակում է, ու Նիկոլ Փաշինյանը դեմ է քվեարկել պետականության օգտին՝ հանրապետության անկախության պաշտպանության համար»,- «168 ժամ»-ի թղթակցի հետ զրույցում ասել է ԺՀ կուսակցության նախագահ, ՀԱԿ անդամ Պևտրոս Մակեյանը' անդրադառնալով ԱԺ-ում «ՀԱՊԿ անդամ պետությունների տարածքում ռազմական ենթակառուցվածքի օբյեկտներ տեղակայելու մասին» միջպետական համաձայնագրի քվեարկությանը, որին կողմ էին քվեարկել ՀԱԿ անդամներ Լյուդմիլա Սարգսյանն ու Գագիկ Ջհանգիրյանը:

«Թե ինչու են մյուս ընկերները կողմ քվեարկել, երևի իրենց հարցնեք: Բայց ես' որպես ՀԱԿ քաղաքական խորհրդի անդամ, գտնում եմ, որ սխալ են վարվել: Նախ, պետք է փաստաթուղթը քննարկվեր քաղխորհրդում, որովհետև որոշում ենք ընդունել, որ օրենսդրական նախաձեռնությունները, փաստաթղթերը, որոնք աշխարհաքաղաքական բնույթի են, պետք է ներկայացվեն ու քննարկվեն դաշինքի խորհրդում: Փաստորեն' շրջանցվել է քաղխորհրդի որոշումն, ու քվեարկել են այնպես, ինչպես իրենք ցանկացել են»,- ասել է նա:

Հարցին' Դուք դե՞մ եք արձանագրության ընդունմանը, Պ. Մակեյանը պատասխանել է. «Մենք կողմ ենք մեր հանրապետության պետականության անկախությանը: Կարծում եմ, ովքեր կողմ են քվեարկել, դեմ են քվեարկել անկախությանը»: Դիտարկմանը, թե, փաստորեն, անկախությանը դեմ քվեարկած պատգամավորների թվում են նաև Լ. Սարգսյանը և Գ. Ջհանգիրյանը, Պ.Մակեյանն արձագանքել է. «Երևի կամ խորությամբ չեն ընկալել փաստաթղթի իմաստը, կամ էլ քվեարկել են այնպես, որտեղից «քամին փչել է»: Նա ավելացրել է, որ այս քվեարկությամբ խախտվել է նաև ՀԱԿ քաղխորհրդի որոշումը, որի համաձայն' ցանկացած օրենսդրական նախաձեռնություն քվեարկությունից առաջ պետք է քննարկվի Քաղխորհրդում' միասնական տեսակետ արտահայտելու համար: