«ՉԻ». Ձեթ և տեսարաններ

«ՉԻ»-ն գրում է. «ՀՀ կառավարությունը որոշել է Ամանորի առթիվ սոցիալապես անապահով 116 հազար ընտանիքների բաժանել երեքական շիշ ձեթ։ Վարչապետ Տիգրան Սարգսյանն էլ հայտարարել է, թե այս օգնությունը լինելու է շարունակական։

«ՉԻ»- Սովորաբար մարդիկ իրենց ամանորյա սեղանները զարդարում են այնպիսի բաներով, որոնք սովորական օրերին շքեղություն են համարում և գտնում են, որ իրենք իրենց նման շքեղություն կարող են թույլ տալ միայն տոնական օրերին։ Հայաստանի կառավարությունը, ուրեմն, խոստովանում է, որ 116 հազար ընտանիքների (այսինքն՝ մոտ կես միլիոն մարդու) համար ձեթն այնպիսի շքեղություն է, որ կարող է տոնական սեղանի զարդ դառնալ։ Հետաքրքիր է՝ ի՞նչ կմտածեր Տիգրան Սարգսյանն այն մարդու մասին, ով Նոր տարուն կայցելեր իրեն ու որպես նվեր կբերեր, ասենք, 200 գրամ բրինձ։

Լավ է գոնե, որ իշխանություններն իրենք էլ են հասկանում, որ իրենց այդ ժեստն անհեթեթություն է։ Եվ անկեղծորեն խոստովանում են. «ունեցածներս ձեթ է՝ ձեթ ենք տալիս, ուրիշ բան ունենայինք՝ ուրիշ բան կտայինք»։ Փաստորեն՝ ժողովրդի բախտը բերել է, որ պահուստային ֆոնդում ձեթի փոխարեն մկնդեղ չի եղել։ Կարող էին նաև մկնդեղ «նվիրել»։

Իսկ ամենաահավորն այն է, որ Տիգրան Սարգսյանը խոստանում է ձեթ նվիրելու ավանդույթը դարձնել շարունակական։ Այսինքն՝ Հայաստանում «շարունակական բնույթ է կրելու» այն իրավիճակը, երբ մարդիկ ամանորյա սեղանին ձեթ ունենալը կհամարեն մեծագույն երջանկություն»։