Աղվան Հովսեփյանը կմտնի՞ ԱԺ՝ ցեղատեսակը կեղծելու մեղադրանքով

Վերջերս ՀՀԿ-ական պատգամավոր Համլետ Հարությունյանը Օսկանյանին անձեռնմխելիությունից զրկելու քվեարկությանը դեմ քվեարկած 6 պատգամավորների մասին ասել էր. «Չկա գյուղ, որ շուն չլինի: Չկա ժողովուրդ, որ դավաճաններ չունենա»։ Փաստորեն, ՀՀԿ-ում որևէ հարցում ամբողջ խմբակցության կամ, ավելի ճիշտ, մեկ անձի որոշմանը համաձայն չլինելը համարվում է ժողովրդի հանդեպ դավաճանություն, իսկ անհամաձայնություն հայտնողին ՀՀԿ-ականներն ասոցացնում են գյուղի շան հետ։ Բավականին հետաքրքիր մոտեցում է կուսակցական գործընկերներին բնորոշելու հարցում։ Պարզվում է, որ ՀՀԿ-ում 6 շուն կա։ Բայց, եթե չեմ սխալվում, ԱԺ պատգամավոր լինելու համար անհրաժեշտ է լինել գոնե մարդ, այն էլ՝ ՀՀ քաղաքացի, ով վերջին 5 տարիներին ապրել է Հայաստանում, իսկ ըստ միջին վիճակագրության՝ շունն ապրում է 7-8 տարի, հետևաբար քիչ է հավանականությունը, որ վերջիններս 5 տարի բնակված լինեին Հայաստանում և կարողացած լինեին հասնել այնքան քաղաքական հասունության, որ դառնային պատգամավոր։

Հետաքրքիր կլինի, որ Աղվան Հովսեփյանը մտնի Ազգային ժողով այս պատգամավորներին անձեռնմխելիությունից զրկելու միջնորդագրով՝ մեղադրելով նրանց իրենց ցեղատեսակը կեղծելու մեջ:

Այս պատմության մեջ կա ևս մեկ հետաքրքրական կողմ. ՀՀԿ-ականներից գրեթե ոչ մեկը չի դիտարկում, որ դեմ քվեարկողների մեջ կարող են լինել ՕԵԿ-ականներ, երևի վստահ լինելով, որ փոքր եղբայրը (կներե՛ք, ՕԵԿ-ին այդքան վեհ բնորոշելու համար) անվերապահորեն կկատարի «կոալիցիոն գործընկերոջ հետ քննարկումների արդյունքում կայացված որոշումը»։

Համլետ Հարությունյանի այսպիսի բնորոշմանը հետևյալ կերպ անդրադարձավ Գալուստ Սահակյանը. «Ես կարծում եմ, որ նա պատգամավոր է, և գնահատում եմ, որ մտահոգ է այդ տեսակետից: Բայց ես կարծում եմ, որ ռազմավարություններ կան, որ ոչ բոլորը կարող էին տեղյակ լինել: Ինձ համար ընդունելի չէ, որ դեմ են: Համենայն դեպս, մենք էլ մեր ռազմավարությունն ունեինք: Դա հանրապետականին վայել չէ, որ ինչ-որ մեկը կարող է դեմ քվեարկել: Բայց այստեղ խնդիրը նաև այլ հարթության մեջ է: Շատ մի՛ պեղեք, որովհետև պեղումներից, չեմ կարծում, որ քաղաքականությունը շահում է»՝ այսպիսով հերթական անգամ ցույց տալով իր մտքի անսահմանափակ թռիչքը։ Պարզվում է՝ Օսկանյանին անձեռնմխելիությունից զրկելը ոչ թե արդարադատության իրականացմանը նպաստող քայլ էր, այլ ՀՀԿ-ի ռազմավարական քայլերից մեկը, իսկ ՀՀԿ-ականին վայել չէ դեմ քվեարկելը՝ անկախ իր անձնական դիրքորոշումից։

Եթե այս ամենին էլ ավելացնենք մեծ մտածողի այն արտահայտությունը, որ Հայաստանի Իվանիշվիլին Օսկանյանն է, ապա ՀՀԿ-ի ռազմավարական քայլը պարզ է դառնում՝ Հայաստանին հետ պահել օսկանյանական երազանքից։

Այս ամենի մեջ մեկ հուսադրող հանգամանք կա. ՀՀկ-ում կան դեռևս 6 ինքնուրույն մտածող անձինք։ Հուսանք, որ նրանք ուղղակի կոճակների տեղը չեն շփոթել։

ԳՐԱՆՏԱԿԵՐ Հակապետականյան