Ինձ համար Էջմիածինն առաջին քաղաքն է. Կարեն Գրիգորյան (տեսանյութ)

Հոկտեմբերի 8-ին Էջմիածին քաղաքի տոնն է: Այս տարի ևս այդ առթիվ Էջմիածնի քաղաքապետարանը բազմաբովանդակ ծրագրեր է նախապատրաստել՝ օրն իսկական տոնի վերածելու համար: Հոկտեմբերի 7-9-ը քաղաքում անցկացվելու են բազում հետաքրքիր միջոցառումներ:

Lurer.com-ի հետ զրույցում Էջմիածնի քաղաքապետ Կարեն Գրիգորյանն ասաց, որ ինչպես ամեն տարի, այս տարի ևս շքերթ է լինելու։ Այս գաղափարը, ըստ քաղաքապետի, մեծ խորհուրդ ունի իր մեջ, քանի որ Մեսրոպ Մաշտոցը շքերթի ու տոնախմբության ուղեկցությամբ է տառերը բերել Էջմիածին։ Նրան այդ ժամանակ դիմավորել են արքան ու կաթողիկոսը, և տոնակատարություններն արքայի հրամանով շարունակվել են երեք օր։

Այս տարի նախատեսվում է տոնի կապակցությամբ  տարբեր միջոցառումներ, ցուցահանդեսներ անցկացնել։ Երեխաները նույնպես անմասն չեն մնա տոնակատարություններից. նրանց համար ևս միջոցառումների անցկացման հատուկ ծրագրեր են մշակվել, այդ թվում՝ համերգ և շքեղ հրավառություն։

-Պարո՛ն քաղաքապետ, ինչո՞ւ եք որոշել հենց  հոկտեմբերի 8-ին նշել քաղաքի տոնը։

Ութը հավերժության խորհրդանիշ է, բայց, այնուամենայնիվ, թիվն այդքան էլ պատահական չէ մեր քաղաքի համար. տարբեր ժամանակահատվածներում, տարբեր դարերում մի շարք հետաքրքիր իրադարձություններ են եղել։ Այդ իսկ պատճառով օրն ընտրել ենք հոկտեմբերի 8-ը։

Քաղաքապետարանին կից կա գեղարվեստական խորհուրդ, որտեղ ցանկացած նման հարց՝ կապված հուշարձանների,  քաղաքի ճարտարապետական տեսքի, փողոցների անվանակոչման հետ, խորհրդակցում ենք, քննարկում լավ ու վատ կողմերը և վերջնականապես հասկանում, թե ինչ կարելի է անել։ Այդ խմբում ներգրավված են բանաստեղծներ, արվեստագետներ, քանդակագործներ, ճարտարապետներ և պարզապես քաղաքի համար սրտացավ մարդիկ։

-Տոնի շրջանակներում հոկտեմբերի 7-9-ը Էջմիածնում կայանալու է ՅՈՒՆԵՍԿՕ-ի «Համաշխարհային ժառանգության քաղաքներ» ընկերակցության տնօրենների խորհրդի նիստը։ Ի՞նչ կարող է դա տալ Էջմիածնին կամ Հայաստանին։

-Նախ տուրիստական առումով մեծ նշանակություն ունի։ Այդ կազմակերպությանն անդամակցում է աշխարհի տարբեր երկրներից շուրջ 248 քաղաք։ ՅՈՒՆԵՍԿՕ-ի «Համաշխարհային ժառանգության քաղաքներ» ընկերակցությանը Հայաստանից երեք քաղաքներ են գրանցված.  առաջինը եղել է Երևանը, երկրորդը՝ Էջմիածինը, այս տարվանից սկսած՝ նաև Գորիս քաղաքը։

Ամեն տարի իրենց նախագահությամբ Բորդի ժողովն է լինում, իսկ երկու տարին մեկ անգամ հիմնական քաղաքներով գագաթնաժողովն է լինում՝ հազարից ավելի մասնակիցներով։ Ժողովներին քննարկվում են պահպանման, ֆինանսավորման խնդիրներ (նաև՝ գրանտների տեսքով), փորձի փոխանակում` թե ինչպես պահպանել այդ ամենը, ժամանակակից տեխնոլոգիաները ինչպես կիրառել, նաև մեթոդներ, որոնք ֆինանսական մեծ խնդիր չեն ներկայացնում և կարող են օգտագործվել, այդպիսով շատ խնդիրներ լուծել։

-Քանի որ վերընտրվեցիք որպես Էջմիածնի քաղաքապետ, ի՞նչ փոփոխություններ եք պատրաստվում իրականացնել։

-Ոչ թե փոփոխություններ, այլ շարունակություններ ունենք անելու, փոփոխությունների առումով միայն եղածը ավելացնել, որովհետև չկա մի բնագավառ, որտեղ ներդրումներ չեն արվել: Ցանկացած ոլորտում՝ նախակրթական, երաժշտական, սպորտային, տանիքաշինություն, ասֆալտապատում, կանաչապատում,  գրադարանաշինություն և այլն, լուծման համար ներդրումներ են արվել և շարունակական բնույթ են կրելու։ Կանաչապատ տարածքներ են վերականգնվել,  այսօր նորերն են հիմնվում, մի քանի օրից պատրաստ կլինի ևս մեկ այգի և քաղաքի տոնից հետո կհանձնվի քաղաքին։ Ամայի տարածքից մեկ հա վերածել ենք կանաչապատ այգու։ Վերականգնել ենք ոռոգման համակարգը, այսինքն՝ ջուրը, որ կյանքի համար առաջնային է։ Կապիտալ վերանորոգվել են չորս մանկապարտեզներ, սպորտդպրոցը, երաժշտական դպրոցը, որոնք այսօր շքեղ տեսք ունեն։ Այս ամենը չորս տարիների աշխատանք է։

-Ի՞նչ ներդրումներ են եղել սոցիալական հատկացումների և հարկային քաղաքականության մեջ։

-Փոփոխություն եղավ «Գույքահարկի և հողի հարկի մասին» ՀՀ օրենքում, որով իրավունք տրվեց՝ պարտաճանաչ հարկատուներին, 2007 թվականը ներառյալ, զիջել թե՛ մայր գումարը, թե՛ տույժերը։ Տարեկան միջինը 500-1000 տարբեր տնտեսվարողների տույժեր ենք զիջել։ Տարեկան շուրջ հարյուր ուսանողի ուսման վարձ ենք օգնում վճարել, քաղաքացիներին հատկացնում ենք բուժման համար գումարներ՝ վիրահատությունից սկսած մինչև դեղամիջոցների հատկացում։

-Որո՞նք են էջմիածին քաղաքի խորհրդանիշները, և ո՞վքեր են ընտրել դրանք։

Կրկին գեղարվեստական խորհուրդն է քննարկումներ և  մրցույթներ  իրականացրել։ Մեկ տարի տևեց միայն գերբի և դրոշի ընտրությունը։

Ամեն գույնն ու մասնիկն իր նշանակությունն ունի։ Դրոշը կազմված է ծիրանագույնից և մանուշակագույնից։ Ծիրանագույնը իրավունք ունեին միայն թագավորները կրել, որը խորհրդանշում է, որ Էջմիածինը մայրաքաղաք է եղել, իսկ մանուշակագույնն իրավունք ունեին եպիսկոպոսից սկսած՝ կրելու, դա էլ խորհրդանշում է, որ էջմիածինը հոգևոր մայրաքաղաք է եղել։ Ունենք նաև զինանշան և հիմն...

-Եթե համեմատելու լինեք Երևանը և Էջմիածինը, ի՞նչ առավելություններ կամ բացթողումներ եք տեսնում երկու քաղաքների միջև։

-Երևանը մեր մայրաքաղաքն է, համեմատական առումով համեմատելու չի, իսկ Էջմիածինը համայն հայության հոգևոր կենտրոնն է։ Այսինքն՝ սա ոչ միայն ՀՀ-ի, այլ ամբողջ Սփյուռքում սփռված հայերի հոգևոր կենտրոնն է։ Ցանկացած հյուր առաջինն այցելում է մեր քաղաք։ Հայաստանի հետ ծանոթությունը սկսվում է հենց այստեղից...Չնայած աշխատատեղերի խնդիր ունի քաղաքը, ժամանակին հզոր արդյունաբերական գործարաններ ենք ունեցել, հիմա մեկ-երկուսն են գործում։ Այդ ուղղությամբ ահագին խնդիրներ ունենք լուծելու։

-Որպես քաղաքապետ՝ ի՞նչ նշանակություն ունի Ձեզ համար Էջմիածինը։

-Ինձ համար առաջին քաղաքն է Էջմիածինը։ Այդ ձգտումով էլ փորձում ենք ամեն ինչ դասավորել, և ամեն ինչում փորձում ենք լավն անել, ոչ թե կիսատ-պռատ։ Սրտացավությամբ ենք մոտենում, որպեսզի հնարավորինս նորմալ քաղաք հանձնենք մեր սերունդներին և հպարտանանք, որ այսպիսի քաղաք ունենք։

Նելլի Ավետիսյան

Հարցազրույցի ամբողջական տարբերակն առաջարկում ենք դիտել տեսանյութում։