Վարդան Ղուկասյանը քեֆ է անելու

Գյումրու դեռևս գործող քաղաքապետ Վարդան Ղուկասյանի որոշմամբ՝ վաղը՝ հոկտեմբերի 7-ին, կնշվի «Գյումրու օր» ամենամյա տոնակատարությունը։ Այս մասին Lurer.com-ի հետ զրույցում ասաց Վարդան Ղուկասյանի մամլո խոսնակ Լիլիթ Աղեկյանը։

Վեջինիս խոսքով՝ ժամը 16.00-ին «Կինո-հոկտեմբեր» կինոթատրոնի նախասրահում կանցկացվի Շերամի և Շիրազ «Հատընտիր» գրքերի շնորհանդեսը, որոնց տպագրությունը հովանավորել է Վարդան Ղուկասյանը։

Ժամը 17.00-ին Շահումյան 188 շենքի բակում կբացվի անվանի գյումրեցի Պոլոզ Մուկուչի արձանը:

Ժամը 17.30-ին Վարդանանց հրապարակում կմեկնարկի տոնական համերգ, իսկ ժամը 22.00-ին շքեղ հրավառություն։

«Կլինեն նաև ավանդական շնորհումներ պատվավոր քաղաքացիներին, որոնց մեր ընտրությամբ ամեն տարի շնորհում ենք»,- հավելեց խոսնակը։

Իսկ այն հարցին, թե օրվա ընտրությունն ինչով է պայմանավորված, Լիլիթ Աղեկյանը պատասխանեց. «Օրվա ընտրության մեջ ոչ մի սիմվոլիկ բան չկա, սովորաբար քաղաքի օրը նշվում է աշնան այս օրերին, մենք բոլորին հրավիրում ենք, եկե՛ք, տեսե՛ք, թե ինչպես են անցկացվում տոնական օրերը։ Մենք ամեն տարի հանգիստ, խաղաղ նշում ենք մեր հայրաքաղաքի տոնը»։

Lurer.com-ի այն դիտարկմանը, թե նորընտիր քաղաքապետ Սամվել Բալասանյանը մասնակցելու է քաղաքի օրվա հետ կապված միջոցառումներին, Լիլիթ Աղեկյանը ասաց. «Ես ինֆորմացյա չունեմ»։

Նույն հարցը հղեցինք նաև Սամվել Բալասանյանի  մամլո խոսնակ Զոհրաբ Եգանյանին, ով մեզ պատասխանեց. «Այս պահին պարոն Բալասանյանը դեռ չի ստանձնել Գյումրու քաղաքապետի պարտականությունները», իսկ լրագրողի այն դիտարկմանը, թե հնարավոր է, որ որպես հյուր մասնակցություն ունենա, վերջինս կրկնեց. «նա դեռ չի ստանձնել Գյումրու քաղաքապետի պարտականությունները»։