Կիպրոսը Եվրամիությունից $14 մլրդ օգնություն է խնդրում

Կիպրոսի ղեկավարությունը Եվրամիությունից 14 մլրդ ԱՄՆ դոլարի չափով ֆինանսական օգնություն է խնդրել: Մասնագետները կարծում են, որ Կիպրոսին անհրաժեշտ է մոտ 7 մլրդ ԱՄՆ դոլար, որպեսզի կարողանա վերականգնել իր երկրի բանկային համակարգը:

Բացի այդ`Կիպրոսն այս տարվա նոյեմբերին իր վարկատուներին պետք է վճարի 751 մլն ԱՄՆ դոլար, սակայն նա այդքան գումար չունի: Մինչև 2015թ. Կիպրոսը պետք է վճարի 6 մլրդ եվրո:

Դեռ հայտնի չէ, թե ինչ պայմաններով է Կիպրոսը ֆինանսական օգնություն ստանալու, սակայն նախկինում Կիպրոսի ղեկավարությունը իրեն առաջարկված ֆինանսական օգնությունից հրաժարվել է:

Կիպրոսը ֆինանսական օգնության համար առաջին անգամ Եվրամիությանը դիմել է այս տարվա հունիսին: Այդ գումարներն ուղվելու էին Հունաստանի ճգնաժամի դեմ պայքարին: Վասոս Շիարլին, Կիպրոսի ֆինանսների նախարարը, դեռ սեպտեմբերի 16-ին հայտնել է, որ վարկատուների հետ համաձայնագրերը կստորագրվեն մոտ օրերին:

Այս տարվա հուլիսին Կիպրոսը 5 մլրդ եվրո ֆինանսական օգնություն էր խնդրել Ռուսաստանի Դաշնությունից: Ֆինանսական օգնության դրական պատասխանն արդեն տրվել է, սակայն գումարը դեռ չի փոխանցվել: