Հայ արվեստագետների ցուցադրությունը` Պեկինում

Սեպտեմբերի 28-ին Պեկինի ազգային թանգարանում կայացել է Պեկինի ժամանակակից արվեստի 5-րդ միջազգային բիենալեի բացման հանդիսությունն, որը կրում էր «Ապագան և իրականությունը» խորագիրը: ՀՀ մշակույթի նախարարության աջակցությամբ բիենալեին մասնակցել են հայաստանցի արվեստագետներ Տիգրան Սահակյանը, Էդվարդ Խարազյանը, Աշոտ Հարությունյանը, Կարեն Ալեքյանը, Ռուբեն Գրիգորյանը, Յուրա Հարությունյանը, Արա Հայթայանը, Մերի Մունը, Գարիկ Կարապետյանը, Համլետ Հովսեփյանը, Նարեկ Ավետիսյանը` 31 ստեղծագործություններով: Բիենալեի ընդհանուր ցուցադրությանը մասնակցել են նաև Աննա Հարությունյանը /Հայաստան/, Տատյանա Ֆերահյանը /Կիպրոս/, Հիլդա և Լենա Կելեկյանները և Հակոբ Սուլահյանը /Լիբանան/։

Բացման արարողությանն ողջույնի խոսքով հանդես են եկել Չինաստանի Հանրապետության մշակույթի նախարարը, բիենալեի կազմակերպիչները, չինացի արվեստագետներ։ Հանդիսությանը ներկա էր Չինաստանում Հայաստանի արտակարգ և լիազոր դեսպան Արմեն Սարգսյանը։

Բացման արարողությանը հաջորդել է գիտաժողով, որի շրջանակում «Հայկական ժամանակակից արվեստ» նախագծի հեղինակ և համադրող Արա Հայթայանը ներկայացրել է հայ ժամանակակից արվեստի ներկա ընթացքն ուսումնասիրող և երեք սերնդի գեղարվեստական որոնումներն արտացոլող ցուցահանդեսը։ Չինացի արվեստաբան Լիլու Ջիանն իր խոսքում նշել է, որ հայաստանցի արվեստագետներն առանձնանում են գեղարվեստական ասելիքի մաքրությամբ, անդրադառնալով, Աշոտ Հարությունյանի «Կորսված հիշողություն» քանդակին և Ռուբեն Գրիգորյանի «Երկրի վրա» կտավին։

Հայ արվեստագետների պատշաճ մասնակցությունը պեկինյան բիենալեին կարևոր խթան է միջազգային արվեստի շրջանակներին ճանաչելի դարձնելու հայ ժամանակակից արվեստը։