Ալիևն Էրդողանին ասել է, թե Բրյուսելում պայմանավորվածություն է ձեռք բերվել «Զանգեզուրի միջանցքի» բացման շուրջ

Ադրբեջանի նախագահ Իլհամ Ալիևն այսօր զանգահարել է Թուրքիայի նախագահ Ռեջեփ Թայիփ Էրդողանին, հայտնում է ադրբեջանական պետության ղեկավարի մամուլի ծառայությունը։

Ըստ հաղորդագրության, Իլհամ Ալիեւը Ռեջեփ Թայիփ Էրդողանին պատմել է նախորդ օրը Բրյուսելում Եվրոպական խորհրդի նախագահի եւ Հայաստանի վարչապետի հետ կայացած բանակցությունների մասին։

 Ալիևը դրական է գնահատել Բրյուսելում կայացած եռակողմ հանդիպման արդյունքները։

Ադրբեջանական պետության ղեկավարը նաև նշել է, որ այսօր կարգադրություն է ստորագրել Ադրբեջանի և Հայաստանի միջև պետական ​​սահմանի սահմանազատման պետական ​​հանձնաժողով ստեղծելու մասին։

Ալիևը նաև նշել է, թե կողմերը պայմանավորվածություն են ձեռք բերել այսպես կոչված` «Զանգեզուրի միջանցքի» բացման, ներառյալ երկաթուղային և ավտոմոբիլային ճանապարհների անցկացման շուրջ։

Թուրքիայի նախագահ Ռեջեփ Թայիփ Էրդողանն իր հերթին շնորհակալություն է հայտնել եռակողմ հանդիպման մասին տեղեկատվության համար և բարձր գնահատել դրանում ձեռք բերված դրական արդյունքները։ Ադրբեջանի և Թուրքիայի նախագահներն ընդգծել են տարածաշրջանում հնարավորինս շուտ խաղաղության հասնելու կարևորությունը։

Զրույցի ընթացքում պետությունների ղեկավարները մտքեր են փոխանակել նաև երկկողմ հարաբերությունների և հետագա շփումների հարցերի շուրջ։