Թուրքիայի դերակատարությունն առաջ է բերելու անցանկալի հարաբերություններ. Արտակ Զաքարյան

«Սիրիայի շուրջ տեղի ունեցող զարգացումները դարձել են արտաքին քաղաքական գործընթաց»։ Այս մասին այսօր լրագրողների հետ հանդիպմանն ասաց ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը և ընդգծեց, որ դրա վառ ապացույցը Թուրքիայի ներգրավվածությունն է. «Թուրքիայի դերակատարությունն առաջ է բերելու անցանկալի հարաբերություններ»:

Զաքարյանի խոսքերով՝ հաջորդ գործընթացը Իրանի միջուկային գործընթացն է: Բանախոսը հույս հայտնեց, որ տարածաշրջանում կկարողանանք պահպանել խաղաղություն, ընդ որում, հարցերը պետք է լուծել խաղաղ բանակցային գործընթացով:

Զաքարյանը նշեց նաև, որ  կարող է գալ մի պահ, երբ Ադրբեջանը դուրս կգա վերահսկողությունից. «Վրաստանում տեղի ունեցան այնպիսի ընտրական գործընթացներ, որոնք ցույց տվեցին, որ ժողովրդավարական մեխանիզմների միջոցով պահպանվեց կայուն վիճակ։ Ադրբեջանը կարող է ներգրավվել տարածաշրջանում տեղի ունեցող գործընթացներում՝ Թուրքիայի ներգրավվածության պայմաններոում»: 

Նա նշեց, որ ցանկացած ներգրավում կխթանի լարվածության սրումը, և նկատեց, որ այս հարցում հայկական կողմը պետք է ուշադիր լինի և քայլեր կազմակերպի և իրականացնի այն հիմքի վրա, որ որևէ կերպ չվտանգի անվտանգությունը և տարածաշրջանում պահպանի վերահսկողություն:

Զաքարյանի խոսքերով՝ այս հարցում կարևոր է Ռուսաստանի դերակատարությունը, ինչպես նաև՝ Եվրոպական միության և Միացյալ նահանգների դերակատարությունը՝ Ադրբեջանի սպառազինությունների աճի նկատմամբ և ԼՂ խնդրի նկատմամբ ապակառուցողական և ոչ նպաստող քայլերի վերաբերյալ։

«Հայաստանը պետք է ավելացնի դիվանագիտական ջանքերը և միջազգային հարթակներում չենթարկվի թուրք-ադրբեջանական սադրիչ գործողություններին, որոնք տարբեր ժամանակներում էլ եղել են»,– ասաց նա:

Անդրադառնալով նաև Հայաստան-ԵՄ հարաբերություններին՝ նա նշեց, որ չէր ցանկանա, որ դրանք կառուցվեին Հայաստան-Հունգարիա հարաբերությունների վրա. «Հունգարիան, բացի պաշտոնական ներողությունից, նաև քաղաքական, բարոյական որոշակի քայլեր պետք է անի »: