Թուրքիան կարող է փակել իր օդային տարածքները Հայաստանի համար. ԶԼՄ-ներ

Եթե Լեռնային Ղարաբաղի օդանավակայանը սկսի իր աշխատանքները, Թուրքիան կարող է փակել իր օդային տարածքները Հայաստանի համար: Այդ մասին հայտնում է ադրբեջանական APA գործակալությունը՝ հղում կատարելով իր դիվանագիտական աղբյուրներին: Այդ աղբյուրների համաձայն՝ վերոնշյալ հարցի շուրջ Թուրքիայի և Ադրբեջանի միջև արդեն որոշակի պայմանավորվածություն է ձեռք բերվել:

Դրանում տեղ գտած հաղորդագրության համաձայն՝ տվյալ հարցը վերջին շրջանում բազմիցս քննարկվել է Ադրբեջանի և Թուրքիայի օդային կառույցների կողմից: Հիշեցնենք, որ Թուրքիայի ԱԳՆ-ը նախկինում դատապարտել էր Ղարաբաղում օդանավակայանի վերաբացումը՝ համարելով այն սադրանք, որը խոչընդոտելու է Ղարաբաղյան հիմնախնդրի խաղաղ կարգավորմանը:

Ստեփանակերտի օդանավակայանը (բացվել է 1974թ.) դադարեցրել էր իր գործունեությունը 1992-ին, երբ մեծամասշտաբ ռազմական գործողություններ էին սկսվել իր անկախությունը հռչակած ԼՂՀ-ի և Ադրբեջանի միջև: Օդանավակայանի վերանորոգման աշխատանքները սկսվել էին 4 տարի առաջ: Երբ հայկական կողմը անցյալ տարի հայտարարեց կանոնավոր իրականացվող թռիչքների վերականգնման մասին, Բաքուն հանդես եկավ սպառնալիքներով՝ խոստանալով վայր գցել Ստեփանակերտից մեկնարկող և այնտեղ վայրէջք կատարող ցանկացած ինքնաթիռ: Դա առաջ բերեց միջազգային հանրության բացասական վերաբերմունքը, իսկ պաշտոնական Երևանը նման սպառնալիքներն անվանեց «պետական ահաբեկչության դրսևորում»:

Նախագահ Սարգսյանը հայտարարել է, որ կդառնա Հայաստան-Ղարաբաղ առաջին չվերթի առաջին ուղևորը: