Մրցույթ-փառատոնի բացումն ազդարարում է երկրորդ փուլի սկիզբը

Գեղագիտության ազգային կենտրոնի Մանկական ստեղծագործության թանգարանում բացվել է «Սիրե՛ք պոետի գույները» համահայկական մանկապատանեկան նկարչական մրցույթ-փառատոնի շրջանակում կազմակերպվող ցուցահանդեսը, որն արդեն երրորդ տարին անընդմեջ կազմակերպում է ՀՀ կրթության և գիտության նախարարությունը՝ Գեղագիտության ազգային կենտրոնի հետ համատեղ: Մրցույթի նպատակն է խրախուսել հայ պոեզիայի իմացությունը, նպաստել հայ մանուկների և պատանիների մոտ պատկերավոր մտածողության զարգացմանը, զգացական աշխարհի հարստացմանը՝ կիրառելով բանաստեղծական արվեստի հանդեպ գեղագիտական մոտեցում:

Այս տարի մրցույթ-փառատոնին ներկայացվել է 6-18 տարեկան երեխաների շուրջ 1500 նկար՝ Սփյուռքի 14 երկրից (ԱՄՆ, Արգենտինա, Իրան, Լիբանան, Մեծ Բրիտանիա, Ղազախստան, Ուզբեկստան, Ուկրաինա, Ուրուգվայ, Ռուսաստան, Սիրիա, Ֆրաստան, Քուվեյթ, Վրաստան), Հայաստանից և Արցախից: Աննախադեպ է հատկապես Հայաստանի և Արցախի արվեստի դպրոցների մասնակցությունը. Արցախից ներկայացվել է 86 նկար՝ 10 դպրոցից, իսկ Հայաստանից շուրջ 1100 նկար՝ 73 դպրոցից:

Մրցույթ-փառատոնն անցկացվում է երկու փուլով: Առաջին փուլում մասնակիցներն իրենց նկարներն էլեկտրոնային տարբերակով փոխանցում են հանձնաժողովին, որոնցից լավագույններն ընտրվում են ցուցահանդեսի համար և հետագայում ներկայացվում են տպագրման համար: Ըստ այդմ՝ առաջին փուլի արդյունքներով ընտվել են շուրջ 350 նկար և գոբելեն: Երկրորդ փուլում ցուցահանդեսին ներկայացված նկարներից ընտրվելու են հիմնական հաղթողները: Երեխաների համար նախատեսված են խրախուսական մրցանակներ:

Քվեարկության արդյունքները, ինչպես նաև մրցանակակիրների անունները հայտնի կդառնան ցուցահանդեսի փակման օրը և կտեղադրվեն www.nca.am և www.edu.am կայքերում: Հրատարակվելու է ցուցահանդեսի կատալոգ, որը կտրամադրվի բոլոր այն մանուկներին և պատանիներին, ում նկարները ցուցադրվել են:

Հաշվի առնելով թեմայի բարդությունը և ուսումնական բնույթը՝ առաջին փուլի մեկնարկից առաջ մանկավարժների համար կազմակերպվել է մեթոդական սեմինար: Սեմինարին ներկայացվել են ծրագրի նպատակները, երեխաների հետ աշխատանքի մեթոդիկան, աշխատանքների գնահատման հիմնական չափանիշները: Սեմինարի տեսագրությունը տեղադրված է www.spyurq.dasagirq.am և Youtube-ում:

Այս տարվա առանձնահատկություններից է նաև այն, որ փառատոնի շրջանակում բացի ցուցահանդեսից, նախատեսվում է կազմակերպել այլ մշակութային միջոցառումներ, մանկական պոեզիայի մրցույթ:

Մրցույթ-փառատոնի կազմակերպման գլխավոր հովանավորը՝ «Արմենթել» ՍՊԸ-ն է։ Միջոցառմանը աջակցել է նաև ACBA բանկը:
Ցուցահանդեսը գործելու է մինչև նոյեմբերի 3-ը: