Մեկ շաբաթում Արցախում հանցագործությունների և պատահարների վերաբերյալ ստացվել է 76 հաղորդում

2022 թվականի մայիսի 31-ից հունիսի 6-ն ընկած ժամանակահատվածում ոստիկանության կենտրոնական և տարածքային ստորաբաժանումների Հերթապահ մասերում հանցագործությունների և պատահարների վերաբերյալ ստացվել է ընդհանուր 76 հաղորդում, որից 57-ը՝ հանցագործությունների վերաբերյալ։ Դրանցից 53-ն արդեն բացահայտվել և քննության փուլում է:

Մարմանական վնասվածք հասցնելու վերաբերյալ հերթապահ մասում 7 հաղորդում է գրանցվել, ևս 2-ը՝ գույքի դիտավորությամբ ոչնչացման, 1-ը՝ խարդախության, 3-ը՝ անձնական ունեցվածքի գողության մասով: Իշխանության ներկայացուցչի նկատմամբ բռնություն գործադրելու 1 դեպք է արձանագրվել:

Ստացված բոլոր ահազանգերի հետքերով անմիջապես դեպքի վայրեր են մեկնել ոստիկանության տարածքային ստորաբաժանումների օպերատիվ խմբերը և օրենքով սահմանված կարգով ընթացքավորել դրանք։

ՔՀ վարչությունը համագործակցելով տարածքային ստորաբաժանումների ծառայողների հետ՝ անցած մեկ շաբաթվա ընթացքում հայտնաբերել է թմրանյութի ապօրինի շրջանառության 1 դեպք և բացահայտել նախկինում կատարված 2 հանցագործություն:
Թմրամիջոցների ապօրինի շրջանառության, զենքի կամ ռազմամթերքի կամովին հանձնման, ինչպես նաև տարբեր հանցատեսակները նվազեցնելու ուղղությամբ ոստիկանության ծառայողներն իրականացնում են կանխարգելիչ միջոցառումներ՝ ինչպես տեղեկատվական, այնպես էլ բնակչության հետ տարվող ամենօրյա պրոֆիլակտիկ աշխատանքով:

Նախորդ շաբաթվա համեմատ կտրուկ աճել է ՃՏՊ դեպքերը: Ճանապարհային ոստիկանության օպերատիվ կառավարման կենտրոնում գրանցվել է ճանապարհատրանսպորտային 30 պատահար, որից 24-ը՝ նյութական վնասով, 6-ը՝ մարմնական:

Ճանապարհապարեկային ծառայության կողմից բացահայտվել է առանց վարորդական վկայականի տրանսպորտային միջոց շահագործելու 45 դեպք, 35 վարորդ եղել է անսթափ վիճակում, 155-ը՝ գերազանցել է սահմանված արագությունը:

Ընդհանուր առմամբ՝ շաբաթվա տրանսպորտային պատահարներից բուժհաստատություն է դիմել 12 քաղաքացի։
Վիճակագրությունը և դրա վերլուծությունը ցույց է տալիս, որ մարմնական վնասվածքներով ուղեկցվող ճանապարհատրանսպորտային պատահարների զգալի մասը տեղի են ունենում արագության ռեժիմը գերազանցելու և վարորդների անսթափ լինելու հետևանքով։
Ուստի, ՆԳ նախարարությունը վարորդներին հորդորում է խստագույնս պահպանել ճանապարհային երթևեկության անվտանգության կանոնները։

Ոստիկանության շրջանային և տարածքային ստորաբաժանումների ծառայողները շաբաթվա ընթացքում ուժեղացաված ռեժիմով իրականացրել են հասարակական կարգի պահպանությունը և հասարակական անվտանգությունը:

Մայիսի 30-ին հանրակրթական դպրոցներում «Վերջին զանգ»-ի միջացառումների ընթացքում, հունիսի 1-ին՝ երեխաների իրավունքների պաշտպանության միջազգային օրը, հունիսի 5-ին պատանիների միջև հեծանվավազքի առաջնությանը՝ ոստիկանության ծառայողները պատշաճորեն հսկել են հասարակական կարգն ու կանոնները և ապահովել անվտանգ երթևեկությունը։

Մայիսի 17-ից Արցախի Հանրապետության տարածքում Ոստիկանությունն իրականացնում է հատուկ միջոցառումներ։

Խստացված ռեժիմով ծառայությունը շարունակվում է: