Չեմ ցանկանում, որ հայ ժողովուրդը երես թեքի Հունգարիայից. Սերժ Սարգսյան

Օրերս ՀՀ նախագահ Սերժ Սարգսյանը հարցազրույց է տվել հունգարական ATV հեռուստաընկերությանը, որը հրապարակվել է վերջինիս պաշտոնական կայքում (atv.hu): Հիմնական թեման եղել է վերջին իրադարձությունների հետևանքով երկու երկրների միջև ստեղծված իրավիճակը:

«Ավելորդ է ասել, որ մենք մեծ ուշադրությամբ հետևում և հետևելու ենք Հունգարիայում ընթացող իրադարձություններին, և մենք իհարկե գիտենք, որ Հունգարիայի ժողովուրդը հանդես է եկել այս որոշման դեմ: Դա նշանակում է՝ Հունգարիայի ներսում այս որոշումը սխալ որոշում են համարում: Ցավալի է, որ Հունգարիայի կառավարությունն իր այդ որոշմամբ լարվածություն ստեղծեց մեր տարածաշրջանում: Ես սա շատ ափսոսանքով եմ ասում, որովհետև մեր ժողովուրդների հարաբերությունները դարերի պատմություն ունեն»,- նշել է ՀՀ նախագահը։

Խոսելով Սաֆարովի արտահանձնման որոշման մասին՝ ՀՀ նախագահը մասնավորապես նշել է. «Մենք դա շատ վատ որոշում ենք համարում... շատ կասկածելի»։

Նախագահ Սարգսյանը գտնում է, որ «Ադրբեջանի քաղաքականությունը շատ քիչ հնարավորություն է տալիս, որ Լեռնային Ղարաբաղում խաղաղությունը հարատև լինի, սակայն, Հայաստանը բոլոր ջանքերը գործադրում է այս ուղղությամբ: ՀՀ քաղաքացիները գիտեն, որ եթե Ադրբեջանը ռազմական հարձակում ձեռնարկի Լեռնային Ղարաբաղի դեմ, ապա հայկական ողջ ներուժը կներդրվի՝ Լեռնային Ղարաբաղի քաղաքացիների պաշտպանությունն ապահովելու համար»:

Սերժ Սարգսյանը նաև շեշտել է, որ հունգարական կառավարությունը քաջատեղյակ է եղել որոշման հետևանքներին այն դեպքում, որ ամիսներ շարունակ հայ բարձրաստիճան պաշտոնյաները հավաստիացրել են, որ Ռամիլ Սաֆարովի արտահանձնումը չպետք է տեղի ունենա: ՀՀ նախագահն ամփոփել է խոսքը հետևյալ խոսքերով. «Ես չեմ ցանկանում, որ հայ ժողովուրդը երես թեքի Հունգարիայից այնպես, ինչպես Հունգարիայի կառավարությունն արեց մեր հանդեպ»: