Հոբիտի անհավանական արկածները

Նոր Զելանդիական Վելինգտոնի բնակիչները՝ «Հոբիտ» ֆիլմի պրեմիարայի նախաշեմին, երեք շաբաթ կապրեն Միջերկրի կենտրոնում, հաղորդում է РИА "Новости", հղում տալով AP-ին։

Ռեժիսոր Փիթեր Ջեքսոնը նկարահանումների մեկնարկն ազդարարել էր դեռ անցյալ տարվա մարտ ամսին։ Ենթադրվում էր, որ ֆիլմը կբաժանվի երկու մասի, սակայն ավելի ուշ պարզվեց, որ Ջեքսոնը անցել է երրորդ մասի նկարահանումներին։

Նոյեմբերի 28-ին նախատեսված «Հոբիտ. Անսպասելի ճանապարհորդություն» ֆիլմի պրեմիերային նվիրված տոնական միջոցառումների իրականացման համար Նոր Զելանդիայի իշխանությունները կծախսեն 1,1 միլիոն ն/զ դոլար (900.000 ԱՄՆ դոլար)։

Տոնական միջոցառումների կորիզներից մեկը Վելլինգտոնի՝ «տոլկիենագետների» շրջանում քաջ հայտնի «Միջերկրի կենտրոն» ժամանակավոր վերանվանումն է։ Այն կտպվի նաև նամակնիշերի վրա։ Գլխավոր քաղաքային թերթը նույնպես կկոչվի «Միջերկրի կենտրոն»

Այդ կապակցությամբ Վելլինգտոնի քաղաքապետը հայտարարել է.

«Հազարավոր մարդիկ ցանկանում են գալ այստեղ ու զվարճանալ»։

Նշենք, որ ֆիլմի դերասանկան կազմում ընդգրկվել է նախորդ՝ «Մատանիների տիրակալը» եռապատման աստղաբույլը։ Նրանց թվում՝ Օրլանդո Բլում (Լեգոլաս), Քեյտ Բլանշետ (էլֆիական թագուհի), Իեն Մքքալեն (Գենդալֆ), էլայջա Վուդ (Ֆրոդո)։ Գլխավոր հերոս՝ Բիլբո Բեգինսի կերպարն այս անգամ Իեն Հոլմի փոխարեն կերտել է Բի-Բի-Սի –ի «Շերլոք » սերիալում դոկտոր Վատսոնի դերը կերտած դերասան Մարտին Ֆրիմենը։

«Հոբիտի» սյուժեյի հիմքում ընկած է «Մատանիների տիրակալը» եռապատման նախերգանքը և պատմում է Բիլբո Բեգինսի անհավանական արկածների մասին։ Հենց այս վիպակն է Ջոն Տոլկինին հայտնություն բերել։