«168 Ժամ». Վարդան Ղուկասյանի թիմը լքում է քաղաքապետարանը

Նախօրեին Գյումրիում նշվել է Քաղաքի օրը: Այս միջոցառումը պետք է միաժամանակ լիներ Վարդան Ղուկասյանի հրաժեշտը Գյումրիին:

Միջոցառումը պաշտոնական առումով բավական անշուք է ստացվել, քանի որ ՀՀ երկրորդ քաղաքի օրվա տոնակատարությանը չի մասնակցել հանրապետական նշանակության որևէ պաշտոնյա, ԱԺ ոչ մի պատգամավոր, նույնիսկ Գյումրիից ընտրված կամ գյումրեցի: Քաղաքի օրվան չեն մասնակցել նաև Գյումրիի նորընտիր քաղաքապետ Սամվել Բալասանյանը և Շիրակի մարզպետ Աշոտ Գիզիրյանը: Որոշ գնահատականներով, սա վկայում է Հայաստանում պետական մտածողության իսպառ բացակայության մասին, երկրի և մարզի պաշտոնյաները կարող էին բոյկոտել Վարդան Ղուկասյանի ծննդյան տոնը կամ անձամբ նրա հետ կապված ցանկացած միջոցառում, բայց ոչ՝ քաղաքի տոնը, որը ոչ մի կապ չունի Ղուկասյանի անձի հետ:

Երեկ «168 ժամ»-ը տեղեկացավ, որ Վ. Ղուկասյանի թիմը լքում է քաղաքապետարանը, և այսօրվանից նրանք այլևս չեն ներկայանա աշխատանքի, քանի որ այսօր Վարդան Ղուկասյանը հրաժարականի դիմում է ներկայացնելու: Աշխատանքից ազատման դիմում գրելու «պաշտոնական առաջարկ» են ստացել նաև փոխքաղաքապետեր Գագիկ Մանուկյանը և Ռուդիկ Հովհաննիսյանը, որպեսզի Ղուկասյանի հրաժարականից հետո քաղաքապետի պաշտոնակատար չնշանակվի նրա տեղակալներից որևէ մեկը: Սամվել Բալասանյանի լիազորությունները սկսվում են նոյեմբերի 12-ից, իսկ մինչ այդ Գյումրիի քաղաքապետի պաշտոնակատար կնշանակվի Շիրակի փոխմարզպետ Սեյրան Պետրոսյանը: