«Առավոտ». «Բարգավաճից» ավելի կաթոլիկ

Երեկ «Սոցիոմետր» կենտրոնի տնօրեն Ահարոն Ադիբեկյանը, անդրադառնալով ՀՀ նախագահական ընտրությունների հավանական արդյունքներին, ներկայացրել է իրենց կատարած ուսումնասիրությունների արդյունքները: Ըստ այդմ` ընդդիմադիր դաշտում առավելությունը Գագիկ Ծառուկյանինն է, մյուս հավանական թեկնածուների շանսերը, ըստ հարցման` գնահատվում են այսպես. Րաֆֆի Հովհաննիսյան` 1.8%, Լևոն Տեր-Պետրոսյան` 0.6%, Վահան Հովհաննիսյան` 1.0%, Արմեն Ռուստամյան` 0.1 %:

«Առավոտ»–ը «Ժառանգություն» կուսակցության փոխնախագահ Արմեն Մարտիրոսյանից հետաքրքրվել է՝ արդյոք Ա. Ադիբեկյանի ներկայացրած թվերը մո՞տ են իրականությանը: Պարոն Մարտիրոսյանն ասաց. «Այս թվերը որևէ ձևով ինձ վստահություն չեն ներշնչում մի քանի պատճառով: Նախ՝ քաղաքականապես ճիշտ չեն ասում, բոլորովին այլ իրավիճակ է: Մյուս կողմից էլ՝ պարոն Ադիբեկյանի ասածները վերջում գրեթե պաշտոնական թվեր են դառնում: Որպես որոշակի կողմնորոշում, քաղաքական գործունեության մաս, իհարկե՝ նրա ասած թվերը որոշակիորեն մտածելու տեղիք են տալիս, և ըստ դրանց' կարելի է կողմնորոշվել, թե իշխանությունները ինչ թվեր են ցանկանում տեսնել, և այն պատվիրատուն, ով նման հարցումներ է պատվիրում: Ասեմ, որ քաղաքական առումով որոշակիորեն սխալ է թույլ տրված, քանի որ ԲՀԿ-ն բազում անգամներ հայտարարել է, որ այլընտրանք է, ընդդիմություն չէ, չգիտեմ՝ ինչու են ցանկանում «Բարգավաճից» ավելի կաթոլիկ լինել»: