Հիմա էլ Շվեդիան է պայման դրել Թուրքիայի առաջ

Շվեդիայի իշխանությունները կարող են չեղարկել Թուրքիայի նկատմամբ զենքի էմբարգոն՝ ՆԱՏՕ-ին անխոչընդոտ անդամակցելու դիմաց։ Այս մասին հայտարարել է Շվեդիայի արտգործնախարար Անն Լինդը։

Euronews-ի հաղորդմամբ՝ Լինդեն նշել է, որ Շվեդիան ունի «աշխարհում զենքի արտահանման ամենախիստ կանոնակարգերը»։ Այնուամենայնիվ, երկիրը պատրաստ է վերանայել իր անվտանգության և պաշտպանության քաղաքականության որոշ կետեր, եթե անդամակցի ՆԱՏՕ-ին։

Դիվանագետը նաեւ ընդգծել է, որ Ստոկհոլմը «զենք չի մատակարարում ահաբեկչական կազմակերպություններին» եւ մտադիր է ամեն ինչ անել դաշինքի, այդ թվում՝ Թուրքիայի անվտանգության համար։

Նշենք, որ ավելի վաղ հաղորդվում էր, որ թուրքական իշխանությունները Շվեդիային և Ֆինլանդիային մի քանի պայմաններ են առաջադրել, որոնց կատարումը կարող է Անկարային դրդել վերանայել իր վերաբերմունքը սկանդինավյան երկրների` ՆԱՏՕ-ին անդամակցելու հարցում։ Մասնավորապես, ինչպես հաղորդում են թուրքական լրատվամիջոցները, երկու երկրները պետք է հայտարարեն, որ աջակցում են Թուրքիային` ահաբեկչական կազմակերպություններին հակազդելու հարցում և ընդունեն համապատասխան օրենսդրական ակտեր, փակեն ՔԲԿ-ի հետ առնչվող բոլոր կազմակերպությունները, նրանց ակտիվներն ու լրատվամիջոցներն իրենց տարածքում և կանխեն դրանց վերաբացումը։ Թուրքական իշխանությունները նաև Շվեդիայից և Ֆինլանդիայից պահանջում են արտահանձնել ահաբեկիչների հետ առնչություն ունեցող անձանց, վերացնել պաշտպանական արդյունաբերության արտադրանքի էմբարգոն և առաջարկում են համագործակցություն հաստատել հետախուզական գործակալությունների միջև` ահաբեկչության դեմ պայքարում։