BBC. Սիրիացի գրոհայինների մոտ ուկրաինական արտադրության զինամթերք է հայտնվել

BBC-ն հայտնում է, որ Սաուդյան Արաբիայի համար նախատեսված ուկրաինական արտադրության զինամթերքը հայտնվել է սիրիացի ապստամբների ձեռքում:

BBC-ի թղթակիցը հայտնել է, որ տեսել է զինամթերքով լի երեք արկղ, որոնք Ուկրաինայից  ուղարկվում էին Սաուդյան Արաբիա, և որոնք, սակայն, հայտվել էին Հալեպ քաղաքի ապստամբների ձեռքում:

Հալեպի մզկիթում հայտնված արկղի պիտակներից պարզ է դարձել, որ նրանցում գտնվում է ուկրաինական Dastan ընկերության արտադրանքը (ընկերությունը մասնագիտացած է ծովային ռազմամթերքի և հրթիռային համալիրների արտադրության մեջ): Որպես արտադրող՝ պիտակի վրա նշված է Լուգանսկի վառոդի գործարանը Ուկրաինայի արևելքում: Դեռևս խորհրդային ժամանակներից գործարանը հանդիսանում է զինամթերքի խոշոր արդյունաբերական կենտրոն:

Ինչպես հայտնում է BBC-ի թղթակից Իեն Փեննելը, որն այցելել էր Հալեպ, դեռ անհայտ է, թե ինչ են պարունակում արկղերը և ինչպես են հայտնվել ապստամբների մոտ: «Սակայն ակնհայտ է, որ Պարսից ծոցի երկրներից մեկն ակտիվորեն աջակցում է ապստամբներին` ընդդեմ Բաշար Ասադի»,- հաղորդում է Փեննելը:

Նա կարծում է նաև, որ սիրիական ապստամբներն արդեն վաղուց չեն թաքցնում Սաուդյան Արաբիայից և Քաթարից ստացվող իրենց ռազմական աջակցությունը:

New York Times-ն էլ իր հերթին կարծում է, որ այս երկու երկրների իշխանությունները ապահովում են սիրիական ապստամբներին հրազենային զինամթերքով, սակայն ձեռնպահ են մնում ավելի ծանր զենքի մատակարարումից, ինչպես օրինակ՝ հրթիռային նռնականետները, վախենալով, որ նման զենքը կարող է հայտնվել ահաբեկիչների ձեռքում: