Ի՞նչ են պլանավորում Թուրքիան և Ադրբեջանը. «Նախիջևան-Կարս»-ը կկառուցվի՞

«Նախիջևան-Կարս» նոր երկաթուղու կառուցման հարցը պահպանում է իր արդիականությունը. հաղորդում է Trend արդրբեջանական լրատվական գործակալությունը։ Այս մասին երեկ հայտարարել է «Ադրբեջանական երկաթուղիներ» ընկերության մամլո ծառայության ղեկավար Նադիր Ազմամեդովը:

«Նախիջևան-Կարս» երկաթուղու կառուցումը հնարավորություն կտա երկաթուղային ճանապարհով դուրս գալ դեպի Թուրքիա, ինչը վերաբերելու է թե՛ ուղևորներին, թե՛ բեռներին. նշել է Ազմամեդովը։ «Այդ հարցը պահպանում է իր այժմեականությունը: Ներկայումս մեր ղեկավարությունը տվյալ հարցով գտնվում է Նախիջևանում: Երկաթուղային նոր հաղորդակցության ստեղծումը ադրբեջանական ու թուրքական կողմերի միջև բանակցությունների առարկա է դարձել»,-հավելել է նա:

«Բաքու-Թբիլիսի-Կարս». այժմ ընթանում են այս երկաթուղու կառուցման աշխատանքները: Այդ երկաթուղին իրար է միացնելու Ադրբեջանի, Վրաստանի և Թուրքիայի երկաթգծերը: Պլանավորված է մինչև տարեվերջ այս երկաթուղով գործարկել աշխատանքային գնացք, իսկ երկաթուղին ողջ ուժով կաշխատի հաջորդ տարի:

Նախնական տվյալների համաձայն՝ սկզբնական փուլում այն ունակ է լինելու տարեկան փոխադրել 1 միլիոն ուղևոր և 6.5 միլիոն տոննա բեռ։ Իսկ ահա հետագայում ԲԹԿ-ի տարեկան հզորությունը կազմելու է 17 միլիոն տոննա բեռ: