Պլեխանովի անվան ՌՏՀ-ի երևանյան մասնաճյուղը 20 տարեկան է. համալսարանի ուսանողները ներկայացրին խելացի ռոբոտ-օգնականի (IRA) մշակումը

Պլեխանովի անվան ՌՏՀ-ի երևանյան մասնաճյուղը 20 տարեկան է:
 
Հունիսի 17-ին տեղի ունեցավ «Ժամանակակից հասարակությունը թվայնացման պայմաններում. ժամանակի մարտահրավերներ» միջազգային գիտագործնական համաժողովը, որը կազմակերպվել էր Գ. Վ. Պլեխանովի անվան Ռուսաստանի տնտեսագիտական ​​համալսարանի Երևանի մասնաճյուղի հիմնադրման 20-ամյակի առթիվ։
 
Գիտաժողովի հանդիսավոր մասի բացումն արեց մասնաճյուղի տնօրեն Թամարա Վարդանյանը, ով առցանց խոսք հղեց Գ.Վ. Պլեխանովի անվան Ռուսաստանի տնտեսագիտական ​​համալսարանի պրոռեկտոր Վիտալի Գրիգորիևիչ Մինաշկինին:

«Գ. Վ. Պլեխանովի անվան ՌՏՀ  երևանյան մասնաճյուղի անձնակազմի և ուսանողների անունից ուզում ենք շնորհակալություն հայտնել Ձեզ՝ Վիտալի Գրիգորևիչ, ինչպես նաև Գ. Վ. Պլեխանովի անվան ՌՏՀ ռեկտոր Իվան Վասիլևիչ Լոբանովին ջերմ խոսքերի համար»,-ասաց Գ.Վ. Պլեխանովի անվան ՌՏՀ երևանյան մասնաճյուղի տնօրեն Թամարա Վարդանյանը։
 
Միջոցառմանը ողջույնի և շնորհավորական խոսքով ելույթ ունեցան Գ. Վ. Պլեխանովի անվան ՌՏՀ  երևանյան մասնաճյուղի հոգաբարձուների խորհրդի նախագահ Արման Վարդանյանը, հոգաբարձուների խորհրդի անդամ, «Թովմասյան» միջազգային հիմնադրամի հոգաբարձուների խորհրդի նախագահ Արտակ  Թովմասյանը, Երևանի «Մոսկվայի տուն» միջազգային բիզնես կենտրոնի գլխավոր տնօրեն Վահրամ Կարապետյանը, «Ռուսալ-Արմենալ» ՓԲԸ տնօրեն՝ Արթուր Զախարյանը, Հայաստանի Հանրապետությունում Ռուսաստանի դեսպանության երկրորդ քարտուղար Եկատերինա Իվանովան, Գ.Վ.Պլեխանովի անվան ՌՏՀ շրջանավարտ Շուշաննա Կոստանյանը։

«Մենք բոլորս ցանկանում ենք ունենալ ուժեղ, հզոր պետություն։ Եվ, ինչպես արդեն ապացուցվել է, ամուր պետության հիմքը հզոր կրթությունն է։ Մեր մասնաճյուղի գործունեությունը շատ կարևոր է ինչպես մեր երկրի ու ժողովրդի, այնպես էլ Ռուսաստանի համար։ Մեր ուսանողները, կարելի է ասել, հայ֊ռուսական հարաբերությունների ակտիվ լոբբիստներն են։ Բոլոր միջոցառումներում նրանց ակտիվ մասնակցությունը ակնհայտ է։ Դասավանդող անձնակազմի դերը նույնպես ահռելի է այս հարցում, որովհետև կրթությունն իր մեջ պարունակում է մի քանի բաղադրիչներ, այն ոչ միայն գիտությունն է, այլ նաև ուսանողի, անհատի պատասխանատվությունն է իր երկրի, ժողովրդի առջև»,- ողջույնի իր խոսքում ասաց Գ. Վ. Պլեխանովի անվան ՌՏՀ երևանյան մասնաճյուղի հոգաբարձուների խորհրդի նախագահ Արման Վարդանյանը։

«Գ. Վ. Պլեխանովի անվան ՌՏՀ֊ի Երևանի մասնաճյուղում իրականացնում ենք այնպիսի մի ծրագիր, որը հեղինակել ենք ուսանողների մոտիվացիայի համար։ Այն է՝ տարբեր ֆակուլտետների լավագույն ուսանողները ստանում են «Թովմասյան» հիմնադրամի կրթաթոշակ։ Այժմ նաև ակտիվ փոխգործակցում ենք՝ թվայնացման ինդուստրիան խրախուսելու նպատակով՝ այդ ֆակուլտետների շրջանավարտներին միանգամից աշխատանքի ընդունելու համար»,- ասաց  Գ. Վ. Պլեխանովի անվան ՌՏՀ երևանյան մասնաճյուղի հոգաբարձուների խորհրդի անդամ, «Թովմասյան» միջազգային հիմնադրամի հոգաբարձուների խորհրդի նախագահ Արտակ Թովմասյանը։
 
Գ. Վ. Պլեխանովի անվան ՌՏՀ ռեկտոր Իվան Վասիլևիչ Լոբանովի անունից մասնաճյուղի գործընկերներն ու աշխատակիցները պարգևատրվեցին Երախտագիտության մեդալով և պատվոգրով։
 
Այնուհետև համալսարանի «Կիրառական ինֆորմատիկայի» ուսանողները ներկայացրին դեմքի ճանաչման համակարգով Խելացի ռոբոտ-օգնականի (IRA) մշակումը:
 
«Ժամանակակից հասարակությունը թվայնացման համատեքստում. ժամանակի մարտահրավերները» միջազգային գիտագործնական համաժողովը բաղկացած էր երկու նստաշրջանից, որում Հայաստանից, Ռուսաստանից և Ուզբեկստանից գիտնականները հանդես եկան զեկույցով՝ ամբողջական և մասնակի:

Կոնֆերանսի մասնակիցները քննարկեցին կրթության, տնտեսության և տեխնոլոգիաների հետ կապված մի շարք հարցեր: