Խավարասերներ ուտելու մրցույթն ավարտվել է հաղթողի մահով

Խավարասերներ ուտելու մրցույթի հաղթողը վախճանվել է մրցույթի արդյունքները հայտնելուց քիչ անց, հայտնում է Lenta.ru-ն՝ հղում կատարելով Ֆլորիդայի Բրոուարդ շրջանի ոստիկանապետի կառավարման կայքին։

Միջադեպը տեղի է ունեցել հոկտեմբերի հինգին Դիրֆիլդ-Բիչ քաղաքի կենդանիների խանութում, որտեղ անցկացվում էր մրցույթը։ Երբ մրցույթի արդյունքներն ամփոփվել են, 32-ամյա Էդվարդ Արչբոլդը, որին հաջողվել է ամենամեծ քանակությամբ խավարասերներն ուտել, իրեն վատ է զգացել։

Արչբոլդը փողոց է դուրս եկել, սակայն գիտակցությունը կորցրել է։ Փրկարարները նրան հիվադանոց են հասցրել, սակայն Արչբոլդին փրկել չի հաջողվել։

Ինչպես նշվում է ոստիկանապետի կայքում, Արչբոլդը մի քանի տասնյակ խավարասեր և որդ է կերել։ Մինչդեռ մրցույթի այլ մասնակիցները, որոնք ևս միջատներ են կերել, գանգատներ չեն ունեցել։ Հաղթողի մահվան պատճառները դեռևս պարզվում են։

Հաղթանակի համար Արչբոլդը պետք է կենդանի պիտոն ստանար, նշվում է ոստիկանապետի կայքում։ Ստեղծված պայմաններում դեռևս պարզ չէ, թե ում կհանձնվի մրցանակը։