«Էրեբունի-Երևան-2794» տոնակատարությանը մոռացվել են քաղաքի համար կարևոր արվեստագետներ

«Էրեբունի-Երևան-2794» տոնակատարության շրջանակներում հանդիսություններ կանցկացվեն բազմաբնույթ ու բազմաբովանդակ թվով 26 բեմահարթակներում:

Lurer.com-ի հետ զրույցում հեղինակ կատարող Վախթանգ Հարությունյանը տեղեկացրեց, որ այդ 26 հարթակներից և ոչ մեկում չեն ընդգրկվել հեղինակ կատարողները։

«Հիանալի է, որ մայրաքաղաքի տոնը նշվելու է մեծ շուքով, ինչի համար հատկացված են 26 տարբեր հարթակներ, սակայն թո՛ւյլ տվեք հիշեցնել, դուք մոռացել եք հեղինակ կատարողներին՝ մարդկանց, ովքեր այս քաղաքի համար շատ ավելի կարևոր են, քան օտարերկրյա «աստղերը», մարդկանց, ովքեր այն քչերից են, որ իսկապես մտահոգված են քաղաքի ներկայով և ապագայով: Հետևապես հաճելի և ցանկալի կլիներ, եթե ևս մեկ հարթակ էլ տրամադրվեր բարդերին։-Ասաց վերջինս և հավելեց.- Ցավալին այն է, որ ինչպես միշտ, տուրք ենք տալիս այն ամենին, ինչ արտաքնապես փայլում է, իսկ բովանդակային առումով ժանգոտած մեխի գին էլ չունի... միգուցե, պարոնա՛յք, առաջին հերթին պետք է լավ իմանալ այն արժեքավորը, որ այս քաղաքում կա, և հետո այդ հարթակները բաժան-բաժան անել մնացած օտարածիններին, թեպետ չեմ կարծում, որ ընդհանրապես դրանց կարիքը կա, ի՞նչ կապ ունեն «սերեբրոները». մեր Երևանի հետ, ու ո՞վ է որոշում, որ նրանք տեղ ունեն նման միջոցառումներում։ Եվս մեկ անգամ հասկանում եմ, որ անհեթեթությունների շարքը դրանով չի ավարտվում։ Ինչպես քաղաքապետարանից են հայտարարում, հարթակներ են տրամադրվել տաբեր երաժշտական նախասիրություններ ունեցողներին. փաստորեն, ըստ քաղաքապետի, հեղինակային երգն այդ շրջանակներում տեղ չի գտնում»։

Հիշեցնենք, որ «Էրեբունի-Երևան-2794» տոնակատարության շրջանակներում հոկտեմբերի 14-ին նախատեսված տոնական միջոցառումները նախատեսվում է անցկացնել մեծ շուքով: Տոնի կապակցությամբ մայրաքաղաք կժամանեն գործընկեր քույր քաղաքներից, ինչպես նաև հանրապետության մարզերի աննախադեպ թվով պատվիրակություններ: Բազմաբնույթ ու բազմաբովանդակ հանդիսություններ կանցկացվեն թվով 26 բեմահարթակներում: Երեկոյի գեղարվեստական մասը կապահովեն նաև արտերկրից ժամանած հայտնի խմբեր ու ճանաչված երգիչներ։ «Էրեբունի-Երևան-2794»-ի կազմակերպիչները հոգացել են, որ տոնական միջոցառումները հնարավորին գրավիչ ու հետաքրքիր լինեն և բավարարեն ամենատարբեր նախասիրությունների տեր մարդկանց պահանջը: