Compass խմբի պրոդյուսերը ներողություն է խնդրել Գոհար Գասպարյանից

Զառա Պետրոսյանը, ով հանդիսանում է «Մանկական եվրատեսիլ-2012»-ում Հայաստանը ներկայացնող  «Compass band» խմբի պրոդյուսերը, ներողություն է խնդրել Գոհար Գասպարյանից՝ «Մանկական եվրատեսիլ»-ի հայկական նախագծի ղեկավարից, նրան թյուրիմացության մեջ գցելու համար:

Ներկայացնում ենք Զառա Պետրոսյանի նամակը.

«Մանկական եվրատեսիլ 2012»-ի Հայաստանյան նախընտրական փուլին մասնակցելու համար Հանրային հեռուստաընկերությանն եմ ներկայացրել «Compass band» խմբի կատարմամբ «Sweetie baby» երգի հայտը: Հայտի հետ ներկայացրել եմ «Compass band»-ի 4 մասնակիցների լուսանկերները եւ ձայնագրված «Sweetie baby» երգը' մենակատար Դավիթ Պարոնիկյանի կատարմամբ: Հետագայում, երգի տեսանյութի պատրաստման ժամանակ, որոշեցի ներառել նաեւ իմ աշակերտ' Միաքայել Վարոսյանի մասնակցությունը, ով որեւէ առնչություն «Compass band»-ի հետ չի ունեցել: Պատրաստված տեսանյութը ինձ բերեց այն մտքի, որ Միքայելին նույնպես կարելի է ներառել «Sweetie baby» պրոյեկտի մեջ' ընդամենը որպես շեյքերահար: Սակայն ինչպես իր բոլոր հարցազրույցներում նշել է հենց Միքայել Վարոսյանը, նա «Compass band»-ի մասնակից չի հանդիսանում:

Միքայել Վարոսյանին որպես շեյքերահար պրոյեկտում ներառելու մասին տեղեկացրել եմ Հ1-ի ղեկավարությանը: Ինձ է զանգահարել Գոհար Գասպարյանը' ճշտելու համար տղայի տարիքը: Վստահ լինելով, որ մի քանի ամսվա տարբերությունը չի կարող խոչընդոտ հանդիսանալ Միքայելի մասնակցության համար /Միքայելի 10 տարին լրանում է 2013 թվականի հուլիս ամսին/' Գոհար Գասպարյանին վստահեցրել եմ, որ Միքայելը 10 տարեկան է:

Բազում միջազգային մրցույթների /28 մրցույթ' Չինաստան, Եգիպտոս, Մալթա, Չեխիա, Բուլղարիա, Մոլդովա, Բելառուս, Ղազախստան, Մակեդոնիա, Ուկրաինա…/, որոնք բերել են Հայաստանին հաղթանակներ / ավելի քան 30 մրցանակ' ի դեմս Վարդուհի Վարդանյանի, Անդրեի, Լիանայի, Էմմա Ասատրյանի, Էրիկի, Անի Քրիստիի, Սերգեյ Գրիգորյանի, Արմինե Օվոյանի /, մասնակցության իմ հսկայածավալ փորձը ցույց է տվել, որ տարիքային առումով մի քանի ամսվա տարբերությունը երբեէ չի համարվել մրցութային կանոնների խախտում: Եղել եմ միջազգային ժյուրիի անդամ եւ պատվավոր հյուր բազում միջազգային մրցույթներին եւ այն դեպքերում, երբ մրցույթի կազմակերպիչները գտել են, որ մասնակիցը արժանի է մասնակցելու մրցույթին, տարիքային մի քանի ամսվա տարբերությունը չի զրկել նրան մասնակցության հնարավորությունից:

Ցանկանում եմ ներողություն խնդրել Հ1-ի ղեկավարությունից եւ իհարկե առաջին հերթին Գոհար Գասպարյանից' նրանց շփոթության մեջ գցելու համար: Հայտարարում եմ, որ Հ1-ը այս ամենի հետ ոչ մի կապ չունի եւ ընկել է այս խառնաշփոթի մեջ բացառությամբ իմ պատճառով:

Անկեղծ լինելով, ուզում եմ ասել, որ չէի ակնկալում հաղթանակ եւ հույս չունեի, որ կկայացվի արդար որոշում: Մեր հաղթանակը մեծ ուրախություն ու անակնկալ եղավ բոլորիս համար' ստիպելով այսուհետ լինել շատ զգոն, քանի որ ինչպես փորձը ցույց տվեց Հայաստանում հնարավոր է արդար մրցույթի անցկացումը: