Թուրքիան սիրիական սահմանի մոտ տեղակայում է հարվածային կործանիչներ

Թուրքիայի գլխավոր շտաբը նվազագույնը 25 հատ F-16 տեսակի հարվածային կործանիչ է ուղարկել Դիարբեքիրի օդային բազայի ուղղությամբ, որը տեղակայված է Սիրիայի սահմանի մոտակայքում. այս մասին հայտնում է Associated Press-ը:

Դա տեղի է ունեցել Թուրքիայի Գլխավոր շտաբի հրամանատարի՝ Սիրիայի հետ սահմանային գոտում գտնվող զորամասերում տեսուչային այց կատարելուց անմիջապես հետո:

Ինչպես գրում է Hurriyet-ը, Նեջդեթ Օզելը և նրան ուղեկցող բարձրաստիճան պաշտոնյաները ստուգել են զինվորական կազմը և նրանց տեղակայման վայրերում տիրող իրավիճակը:

Դրա հետ գրեթե միաժամանակ ՆԱՏՕ-ի գլխավոր քարտուղար Անդերս Ֆոգ Ռասմուսենը հայտարարել է, որ դաշինքն արդեն պատրաստել է Թուքիայի պաշտպանության հարցում բոլոր անհրաժեշտ պլանները և կարող է դրանք գործի դնել անհրաժեշտության դեպքում:

Թուրք-սիրիական սահմանին տիրող իրավիճակը շարունակվում է լարված մնալ արդեն մեկ շաբաթից ավել: Սիրիական զորքերը, կրակ բացելով ապստամբների վրա, մի քանի անգամ հարված են հասցրել թուրքական տարածքներին՝ առաջ բերելով Անկարայի զայրույթը: Թուրքական կառավարությունն արդեն հայտարարել է, որ նման արարքներն անպատասխան չի թողնելու: