Լավրովը մեկնաբանել է Երևանի կողմից բանակցությունները ձգձգելու մասին Բայրամովի խոսքերը

Ռուսաստանի արտգործնախարար Սերգեյ Լավրովը Երեւան կատարած այցի ընթացքում հաստատում է ստացել սահմանազատման հանձնաժողովի աշխատանքներին մասնակցելու պատրաստակամության մասին։ Այս մասին նա հայտարարել է Բաքվում իր ադրբեջանցի գործընկերոջ հետ ճեպազրույցի ժամանակ՝ պատասխանելով այն հարցին, թե իբր Հայաստանը չի կատարում իր պարտավորությունները, որպեսզի ժամանակ շահի։

«Մենք մի քանի շաբաթ առաջ Երեւանում խոսել ենք եւ՛ վարչապետի, եւ՛ արտգործնախարարի հետ։ Նրանք հաստատել են սահմանազատման հանձնաժողովի շրջանակներում երկրորդ հանդիպմանը մասնակցելու պատրաստակամությունը»,- ասել է Լավրովը։

Նրա խոսքով՝ այդ հանդիպումը կկայանա Մոսկվայում։ Ներկայում բանակցություններ են ընթանում երկու կողմերի հետ դրա անցկացման ժամկետի վերաբերյալ։ Լավրովը նշել է, որ ոչ մի կողմից չի տեսել ազդանշաններ, որ նրանք փոշմանել են եւ չեն ցանկանում մասնակցել այդ աշխատանքին։ «Ընդհակառակը՝ ես հաստատում եմ ստացել եւ Երեւանում, եւ՛ այսօր բանակցությունների ընթացքում, որ սահմանազատումը այս փուլում բոլոր ջանքերի կարեւոր բաղադրիչն է»:

Նշենք, որ ավելի վաղ նույն ասուլիսի ժամանակ Ադրբեջանի արտգործնախարար Ջեյհուն Բայրամովը հայտարարել էր, թե հայ-ադրբեջանական հարաբերությունների կարգավորման բանակցությունների արհեստական ձգձգումը հղի է լուրջ ռիսկերով։