Հայկ Խանումյանի դեմ քրեական հետապնդումը դադարեցվել է

«Արցախի եվրոպական շարժում» ՀԿ նախագահ և ԼՂՀ նախագահի թեկնածու Վիտալի Բալասանյանի շտաբի ներկայացուցիչ Հայկ Խանումյանը իր և ԼՂՀ իրավապահների վեճին անդրադարձել է ֆեյսբուքյան իր էջում։

Գրառումը ներկայացնում ենք ստորև.

«Սիրելի բարեկամներ,

Ինչպես գիտեք հարուցված էր քրեական գործ, որում ես ներգրավված էի որպես մեղադրյալ: Այսօր, հոկտեմբերի 9-ին, ես միջնորդություն եմ ներկայացրել ԼՂՀ ընդհանուր իրավասության առաջին ատյանի դատարան՝ միջնորդելով կարճել գործի վարույթը և դադարեցնել իմ դեմ քրեական հետապնդումը: Դատարանը բավարարել է իմ միջնորդությունը՝ կարճելով գործի վարույթը և դադարեցնելով իմ դեմ քրեական հետապնդումը:

Ցանկանում եմ շնորհակալությունս հայտնել պաշտպանիս՝ փաստաբան Հայկ Ալումյանին, ԼՂՀ և ՀՀ այն բոլոր կազմակերպություններին և անձանց, ովքեր հրապարակայնորեն, բարոյապես և ֆինանսապես սատարեցին ինձ, մասնավորապես՝ իմ պաշտպանության համար Արցախում ստեղծված հասարակական կոմիտեին, իմ պաշտպանությամբ հանդես եկած հայաստանյան լրագրողական կազմակերպություններին և լրատվամիջոցներին, քաղաքացիական հասարակության, համալսարանական և քաղաքական շրջանակների իմ բոլոր գործընկերներին, նախկին ուսանողներիս, ընկերներիս և բոլոր այն անձանց, ովքեր անտարբեր չեն եղել գործի նկատմամբ:

Հատուկ շնորհակալություն եմ հայտնում կնոջս՝ Դիանա Մովսիսյանին, ով մեծ քաջություն և կամք դրսևորեց այս ամբողջ ընթացքում: Ամուսնական կյանքը մենք սկսում ենք դատական գործընթացի մեջ ներգրավված, և միգուցե սա էլ խորհրդանշական երևույթ է»:

Հիշեցնենք, որ նրա նկատմամբ հարուցվել էր քրեական գործ ՀՀ/ԼՂՀ քրեական օրենսգրքի 258-րդ հոդվածի 2-րդ մասով, որտեղ վերջինս  ներգրավված էր, որպես մեղադրյալ խափանման միջոց կիրառելով ստորագրությամբ չհեռանալը: