Հայաստանում մեկնարկել են «Հիշողության կերպարանքները»

Հայ գրատպության 500-ամյակի և Երևանը գրքի համաշխարհային մայրաքաղաք միջոցառումների համատեքստում, ՀՀ մշակույթի նախարարության և Հումանիտար համագործակցության միջպետական հիմնադրամի աջակցությամբ՝ ս. թ. հոկտեմբերի 7-11-ը անցկացվում են «Հիշողության կերպարանքները: Ձեռագիր և տպագիր ժառանգության պահպանման ու վերականգնման նորագույն տեխնոլոգիաները» խորագրով 2-րդ միջազգային գիտագործնական սեմինարը և «Կանխարգելիչ կոնսերվացումը թանգարանային հավաքածուների պահպանման հիմնական գործոն. ձեռագիր հավաքածուներ» խորագրով ՅՈՒՆԵՍԿՕ/ԻԿՕՄ-ի տարածաշրջանային թեմատիկ վարժանքը: Սույն միջոցառումների շրջանակում նախատեսվում են դասախոսություններ, վարպետության դասեր, կլոր սեղան-քննարկումներ, որոնք կվարեն ԱՊՀ, Բալթյան և եվրոպական երկրների թանգարանային, գրադարանային, արխիվային առաջատար հաստատությունների, վերականգնողական կենտրոնների մասնագետներ: Սեմինարի շրջանակներում կարծարծվեն ձեռագիր և տպագիր ժառանգության պահպանման հիմնական ոլորտների ֆոնդային, վերականգնման և թվայնացման աշխատանքների հետ կապված արդի խնդիրները և դրանց լուծման եղանակները (Վ.Պարֆյոնով՝ «Թղթի և մագաղաթի լազերային մաքրում» (ՌԴ), Պ. Լիվի՝ «Գրքի կազմերի վերականգնում» (Իտալիա), Տ. Տիմչենկո «Փաստաթղթերը թվայնացման նախապատրաստելու ռազմավարության հարցի շուրջ» (Լիտվա), Մ. Յաշկե «Թղթի նախապատրաստումը ժամանակակից կազմերի համար» (Գերմանիա), Ա. Գորիշնյակ «Արխիվային ժառանգության կոնսերվացումն ու վերականգնումը. հազվագյուտ գրքեր, ձեռագրեր, փաստաթղթեր» (Ուկրաինա), Լ. Արոնով՝ «Փաստաթղթերի պահպանման ապահովման կազմակերպումը ՌԴ պետական արխիվում» (Ռուսաստան) և այլն): Ծրագրում նախատեսվում է նաև երկու նախագծերի մասնակիցների միացյալ կլոր սեղան՝ «Մատենադարանը՝ բազային կազմակերպություն գրավոր ժառանգության պահպանման ոլորտում. առաջնահերթություններ» թեմայով:

Ս. թ. հոկտեմբերի 7-ին «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտում տեղի է ունեցել նշված նախագծերին նվիրված մամուլի ասուլիս, որի ընթացքում Մատենադարանի տնօրեն Հրաչյա Թամրազյանը, սեմինարի տնօրեն Արա Խզմալյանը, փորձագետներ Գենադի Զալաևը (ՌԴ), Տատյանա Կրուպան (Ուկրաինա) և Տատյանա Տիմչենկոն (Լիտվա) պատասխանել են լրագրողների հարցերին և ներկայացրել «Հիշողության կերպարանքները» 1-ին միջազգային սեմինարի նյութերն ամփոփող ժողովածուն և ֆիլմը: