Der Standard. Բենիամին Նաթանյահուն արտահերթ ընտրություններ է անցկացնում Իսրայելում

Դրա հիմքում, ամենայն հավանակնությամբ, ընկած են բյուջեի շուրջ տարաձայնությունները: Նաթանյահուն խորհրդարանում մեծամասնություն է զբաղեցնում՝ 120 մանդատից ունենալով 66-ը:

Իսրայելի վարչապետ Բենիամին Նաթանյահուն ցանկանում է 2013թ. սկզբին արտահերթ ընտրություններ անցկացնել՝ խորհրդարանում ճնշող մեծամասնություն զբաղեցնելու համար: «Մեր երկրի բարեկեցությունը պարտավորեցնում է ինձ այժմ ինչքան հնարավոր է արագ նոր ընտրություններ անցկացնել»,-ասել է կառավարության ղեկավարը Երուսաղեմում երեքշաբթի երեկոյան լրագրողների հետ հանդիպման ժամանակ. փոխանցում է թերթը:

«Ես ուզում եմ ժողովրդից նոր մանդատ խնդրել»: Նա հստակ ժամկետներ չի նշել, սակայն, հնարավոր է, որ խոսքը գնում է եռամսյա ժամկետում կարճ ընտրարշավի մասին:

Իսրայելական ԶԼՄ-ները հաղորդում են, որ Նաթանյահուն պլանավորում է նոր ընտրությունները փետրվարի 12-ին, իսկ ընդդիմությունը խոսում է ավելի վաղ ժամկետների մասին:

Նրա գլխավորած կոալիցիան իշխանության գլուխ է եկել 2009թ.: Լինելով խորհրդարանում մեծամասնություն՝ այսուհանդերձ, Նաթանյահուն չի կարողացել փոխզիջման գալ խորհրդարանի իր գործընկերների հետ երկրի բյուջեի ձևավորման հարցում:

Նրա խոսքերով՝ նա որոշել է խորհրդարանական ընտրություններն ավելի վաղ ժամկետի տեղափոխել, քանի որ գործընկերների հետ տարաձայնություններն անհնար են դարձրել 2013-ի բյուջեի ընդունումը: