Փոխվարչապետն աշխատանքային այցով Սյունիքում էր

ՀՀ փոխվարչապետ, տարածքային կառավարման նախարար Արմեն Գեւորգյանն երեկ աշխատանքային այցով մեկնեց Սյունիքի մարզ:

Սիսիանում փոխվարչապետը մասնակցեց տարածաշրջանի համայնքների միության կողմից իրականացված «Համատեղ ուժերով զարգացնենք համայնքը» ծրագրի շնորհանդեսի արարողությանը, որի ընթացքում ներկայացվեց միության կազմում ընդգրկված համայնքների գույքահարկի եւ հողի հարկի ավտոմատացված համակարգի ցանցը, միության կայքը: Համակարգի շնորհիվ համայնքների գույքահարկի եւ հողի հարկի բազաների կառավարումը կդառնա առավել արդյունավետ, համայնքներն իրական ժամանակի ռեժիմով կարող են ծանոթանալ իրենց բազաներին: Ներկայացվեցին նաեւ ծրագրի շրջանակում մշակված միջհամայնքային համագործակցության հինգ նախագծեր, որոնք մասնավորապես վերաբերում են համայնքներում աղբահանության կազմակերպմանը, միջհամայնքային ճանապարհների բարեկարգմանը, համայնքային կարեւորության այլ խնդիրների: Նշված ծրագրերը կյանքի կոչելու համար Սիսիանի համայնքների միությունը մտադիր է դիմել դոնոր կազմակերպություններին: «Համատեղ ուժերով զարգացնենք համայնքը» ծրագիրն իրագործվել է ԱՄՆ ՄԶԳ աջակցությամբ «Քաունթերփարթ ինթերնեշնլ» կազմակերպության կողմից իրականացվող «Քաղաքացիական հասարակության եւ տեղական ինքնակառավարման աջակցության ծրագրի» շրջանակում:

Փոխվարչապետը գոհունակություն հայտնելով ավտոմատացված ցանցի ներդրման առնչությամբ` հույս հայտնեց, որ այն կնպաստի համայնքների կողմից սեփական եկամուտների հավաքագրման արդյունավետության եւ բյուջետային կարգապահության բարձրացմանը: Նա կարեւորեց ծրագրի կիրառությունը համայնքային մյուս միությունների կողմից: Փոխվարչապետը հետաքրքիր համարեց նաեւ միջհամայնքային համագործակցության ծրագրերը` պատրաստակամություն հայտնելով աջակցել դրանց իրագործման համար ռեսուրսներ գտնելու հարցում: 

Այցի շրջանակում փոխվարչապետը Սիսիան եւ Գորիս քաղաքներում մասնակցեց փոստային մասնաճյուղերի, իսկ Տաթեւ համայնքում`փոստային բաժանմունքի վերաբացման արարողություններին: «Հայփոստ» ՓԲԸ հավատարմագրային կառավարիչ «Հայփոստ Թրաստ Մենեջմենթ»-ը մարզերում շարունակում է արդիականացման ծրագիրը: Միայն այս տարի մարզերում վերաբացվել է արդիականացված 38 բաժանմունք, ծրագիրը շարունակական է, եւ հաջորդ տարի նախատեսվում է արդիականացնել եւս 35-ը: Նշվեց, որ մինչեւ տարեվերջ կնորացվեն եւ կվերաբացվեն նաեւ Ագարակի, Քաջարանի, Կապանի փոստային բաժանմունքները: Վերազինված բաժանմունքների միջոցով քաղաքացիներին ավելի արագ եւ օպերատիվ փոստային, ֆինանսական եւ կոմերցիոն ծառայություններ կմատուցվեն: Բաժանմունքներում փոխվել եւ նորացվել են ենթակառուցվածքները, տեղադրվել են արդի ծրագրերին համապատասխանող նոր համակարգիչներ, նորացվել է մալուխային համակարգը:

Փոխվարչապետը շրջայց կատարեց նորացված բաժանմունքներում, ծանոթացավ պայմաններին, կատարված աշխատանքներին: Նա դրական գնահատեց արդյունքները` հատկապես կարեւորելով այն, որ հեռավոր մարզերի բնակիչներին եւս հասանելի են դառնում որակյալ ծառայությունները:

Տաթեւի վերաբացված փոստային բաժանմունքում էլ փոխվարչապետը խորհրդակցություն անցկացրեց`«Տաթեւի վերածնունդ» զբոսաշրջային ծրագրի իրականացման ընթացքի քննարկման նպատակով: Մասնակցում էին Սյունիքի մարզպետ Ս. Խաչատրյանը, Հայաստանի ազգային մրցունակության հիմնադրամի գործադիր տնօրեն Ա. Խաչատուրյանը, տարածաքային կառավարման, քաղաքաշինության, մշակույթի նախարարությունների ներկայացուցիչներ, համապատասխան համայնքների ղեկավարներ: Անդրադարձ եղավ անհրաժեշտ ենթակառուցվածքների ձեւավորմանը, իրավական կարգավորում պահանջող հարցերին, կարեւորվեց շահագրգիռ մարմինների համագործակցված աշխատանքը: Փոխվարչապետը տարածքային եւ տեղական իշխանությունների ներկայացուցիչներին հորդորեց ամենայն աջակցություն ցուցաբերել ծրագրի իրականացմանը: