ԵՄ-ն անպայման կշփվի և՛ Երևանի, և՛ Բաքվի հետ՝ լուծելու բոլոր խնդիրները. ԵՄ հատուկ ներկայացուցիչ
Արտաքին ՔաղաքականԵՄ-ն անպայման շփումներ կունենա և՛ Երևանի, և՛ Բաքվի հետ՝ լուծելու բոլոր կարևոր խնդիրները, այդ թվում՝ հայ֊ադրբեջանական խաղաղության հարցը։ Այս մասին Trend գործակալությանը տված հարցազրույցում ասել է ԵՄ հատուկ ներկայացուցիչ Տոյվո Կլաարը։
«Հուսով եմ, որ ապագայում ականատես կլինենք Ադրբեջանի ու Հայաստանի ղեկավարների հանդիպումներին։ Նրանց և նախագահ Շառլ Միշելին հաջողվել է առաջընթաց գրանցել մի շարք կարևոր հարցերում։ Մենք շարունակելու ենք աշխատել այլ մակարդակներում։ Անձամբ ես, իմ թիմի և նախագահ Շառլ Միշելի գրասենյակի գործընկերների հետ, անպայման շփումներ կունենանք և՛ Բաքվի, և՛ Երևանի հետ՝ լուծելու բոլոր՝ այդ թվում՝ խաղաղության պայմանագրի, հաղորդակցության վերականգնման, սահմանային խնդիրները»,- ասել է ԵՄ հատուկ ներկայացուցիչը՝ ընդգծելով, որ Հարավային Կովկասում տրանսպորտային հաղորդակցությունների բացման հետ կապված՝ ԵՄ-ն արդեն փորձել է օգնություն ցուցաբերել։
Նա հավելել է, որ տարածաշրջանում տրանսպորտային ենթակառուցվածքների և հաղորդակցության վերականգնումն ավելի շատ ներդրողների կգրավի, որոնք կօգտագործեն այն միջազգային տարանցման և առևտրի համար: