Պետությունը կվճարի անապահով ընտանիքների ուսանողների ուսման վարձերը (տեսանյութ)

Կառավարության այսօր տեղի ունեցած նիստին ընդունած որոշման շնորհիվ հնարավորություն է տրվում անապահովության համակարգում ընդգրկված ընտանիքների ուսանողների համար լրացուցիչ հնարավորություններ ստեղծել բարձրագույն մասնագիտական կրթություն ստանալու համար: Այս մասին այսօր լրագրողների հետ զրույցում ասաց ՀՀ ԿԳ նախարար Արմեն Աշոտյանը:

Նախարարի խոսքերով՝ իրենց կողմից կատարված ուսումնասիրությունները ցույց են տվել, որ ամենաաղքատ ընտանիքներից ուսանողների ներգրավումը բուհեր շուրջ վեց անգամ ցածր է, քան ամենահարուստ ընտանիքներից. «Ակնհայտ է դառնում, որ սոցիալական խնդիրները ստեղծում են երիտասարդների համար անհավասար պայմաններ և սահմանափակում են անապահով ընտանիքների լավ սովորող ուսանողների՝ կրթություն ստանալու հնարավորությունը»,-ասաց Արմեն Աշոտյանը:

Վերջինս նշեց, որ համապատասխան սանդղակի և սոցիալական կարիքների գնահատման հիման վրա այդ ուսանողներին կտրամադրվի ուսման վարձի փողհատուցում հիսուն տոկոսից նվազագույն չափով:

«Փողհատուցումը կլինի հիսուն տոկոս, փողհատուցման առավելագույն չափը կլինի հարյուր տոկոս: 

2013 թվականի սեպտեմբերի մեկից այս համակարգը կսկսի գործել, և հաջորդ տարի այս համակարգում, մեր կանխատեսումներով, ընդգրկված կլինեն 1000 ուսանողներ, ովքեր հնարավորություն կստանան կրթությունը շարունակել առանց մտահոգվելու իրենց ընտանիքի սոցիալական խնդիրներով: 2015 թվականին, մեր կանխատեսումներով, այս համակարգի շահառուների թիվը կհասնի 2500 ուսանողի: Սա իրականում լուրջ խնդիր է մեզ համար, որովհետև լավ սովորող, բայց սոցիալապես անապահով ուսանողները երբեմն դիմումներ են գրում, որպեսզի առկա համակարգից անցնեն հեռակա համակարգի, որ կարողանան զուգահեռ աշխատել»,-նշեց նախարարը: