Ղարաբաղյան պատերազմը նոր մարտահրավերներ ստեղծեց հայկական մշակութային ժառանգության պահպանման հարցում․ Դումանյան

««Հայաստան. ժառանգության կարեւորության ուսումնասիրումը, պահպանումը եւ գնահատումը» ծրագիրը խորհրդանշում է Հայաստանի եւ Ֆրանսիայի միջեւ ձեւավորված սերտ պատմական եւ մշակութային կապը»։ Այս մասին հուլիսի 11-ին վերոնշյալ ծրագրիրը ներկայացնելու ժամանակ ասաց կրթության, գիտության, մշակույթի եւ սպորտի նախարար Վահրամ Դումանյանը։

Միջոցառմանը ներկա էր նաեւ Հայաստանում Ֆրանսիայի արտակարգ եւ լիազոր դեսպան Անն Լույոն։

Ծրագիրը, ինչպես նշեց նախարարը, մատնանշում է երկու երկրների համագործակցության զարգացման հեռանկարները։ Դումանյանի խոսքով, Հայաստանն ունի բավականին հարուստ պատմամշակութային ժառանգություն։

«Այս ժառանգության պահպանումը, ինչպես Հայաստանի տարածքում, այնպես էլ արտերկրում, պետական քաղաքականության արտոնություններից է։ Այս արտոնությունն առաջնահերթություն է ստացել, մասնավորապես, 2020 թվականին՝ Ղարաբաղում 44-օրյա պատերազմից հետո Ադրբեջանի նախաձեռնած մշակութային ցեղասպանության հետեւանքով։ Սա նոր մարտահրավերներ ստեղծեց Հայաստանից դուրս հայկական մշակութային ժառանգության պահպանման համար։ Այս ծրագիրը մշակութային ժառանգության պահպանմանն ուղղված միջազգային համագործակցության լավագույն օրինակն է։ Այն միավորում է Հայաստանի եւ Ֆրանսիայի տարբեր մշակութային կազմակերպություններին մեկ հարթակի վրա։ Սա հնարավորություն է տալիս առավել արդյունավետ իրականացնել մշակութային ժառանգության պահպանման գործընթացը»,- ասաց նախարարը։

Նա շնորհակալություն հայտնեց Ֆրանսիայի դեսպանությանը, ինչպես նաեւ Անն Լույոյին աջակցության եւ ակտիվ մասնակցության համար։