Հայ-թուրքական արձանագրությունները Հայաստանի շահերից չեն բխում

«Իրականությանը չի համապատասխանում, երբ ասում են՝ հայ-թուրքական արձանագրությունները մահացել են, քանի որ իրավաբանորեն դրանք կան։ Արձանագրությունները նույն վիճակում են, ինչպիսին ստորագրվել են երեք տարի առաջ»։ Այս մասին լրագրողների հետ հանդիպմանն ասաց Հայ հեղափոխական դաշնակցության Հայ դատի և քաղաքական հարցերի գրասենյակի պատասխանատու Կիրո Մանոյանը։

«Այս արձանագրությունները Հայաստանի շահերից չեն բխում, և այդ կարծիքին ենք նաև հիմա՝ ստորագրությունից երեք տարի անց: Կարծում եմ, որ այդ արձանագրություններն իրավականորեն չպետք է գոյություն ունենան,և հարկավոր է, որ Հայաստանը հետ վերցնի ստորագրությունը։ Հայաստանը հիմնավոր պատճառներ ունի ստորագրությունները հետ կանչելու համար, և այդ ամենը տարածաշրջանում կայունությանը չի սպառնա»,-նշեց վերջինս։

Կիրո Մանոյանը նկատում է նաև, որ այս վիճակը մեր երկրի շահերից չի բխում, այդ իսկ պատճառով կողմ չեն այդ արձանագրությունների վավերացմանը: «Դրանից հետո Հայաստանի համար ավելի ծանր վիճակ կստեղծվի, եթե Թուրքիան վավերացնի ժամկետներ չունեցող արձանագրությունը»,- նկատեց բանախոսը:

Անդրադառնալով Վրաստանում կայացած խորհրդարանական ընտրություններին՝ նա հույս հայտնեց, որ իշխանությունները կկարողանան առնվազն ինչ-որ չափով կարգավորել Ջավախքի հարցերը: