«Մարդու իրավունքները ֆոտոխցիկում» լուսանկարների ցուցահանդես

Այսօր՝ ժամը 15.00-ին, «Սիրահարների այգում» տեղի ունեցավ «Մարդու իրավունքները ֆոտոխցիկում» լուսանկարների ցուցահանդեսի պաշտոնական բացումը։ Միջոցառումը կազմակերպել էր «Սոցիոսկոպ» ՀԿ-ն՝ Հայաստանում ԱՄՆ դեսպանատան աջակցությամբ։

Միջոցառման սկզբում «Սոցիոսկոպ» ՀԿ տնօրեն Էվելին Գյուլխանդյանը ներկայացրեց դրա նպատակը, այն է՝ հասարակության և պետության ուշադրությունը սևեռել Հայաստանում մարդու իրավունքների հարցին և խրախուսել այս թեմայով հետաքրքրվող լուսանկարիչներին։

Միջոցառման ընթացքում հայտարարվեցին երեք մրցանակային լուսանկարների հեղինակների անունները։ Ժյուրին առաջին տեղը շնորհել էր Նազիկ Արմենակյանի՝ խաղաղ պայմաններում զոհված ժամկետային զինծառայողների մայրերի երթը պատկերող լուսանկարին։

Երկրորդ տեղը շնորհվեց Արևիկ Մարտիրոսյանի և Վահե Բուդումյանի համատեղ աշխատանքին, որը պատկերում էր բացօթյա առևտրի թույլտվության համար պայքարողներին և նրանց տեսանկարահանող ոստիկաններին։

Իսկ երրորդ մրցանակը տրվեց Լիլիթ Մուրադյանի՝ հուսալի ապագայի կարոտ գյումրեցի տղայի լուսանկարին։

Հաղթողները պարգևատրվեցին համապատասխանաբար հարյուր հազար, յոթանասուն հազար և հիսուն հազար դրամով։ Պարգևները հանձնեցին ժյուրիի անդամներ Վահան Քոչարը (լուսանկարիչ), Նունե Հախվերդյանը (լրագրող, թատերագետ), Տիգրան Խզմալյանը (կինոռեժիսոր)։

Հյուրերի շարքում էին ԱՄՆ դեսպանատան Զարգացման ծրագրերի աջակցության համակարգող Ռեյջին Ստոքսը, իրավապաշտպան Միքայել Դանիելյանը, Հարավկովկասյան իրավապաշտպանների ցանցի անդամներ և այլ ՀԿ ներկայացուցիչներ։ Միքայել Դանիելյանը հանդես եկավ Հայաստանում մարդու իրավունքների պաշտպանությունը կարևորող ուղերձով։

Ցուցահանդեսի ընթացքում մասնակիցներն իրենց նախընտրած լուսանկարի համար քվեարկելու հնարավորություն ունեցան, որի արդյունքում որոշվեց «Հանդիսատեսի համակրանք» հատուկ մրցանակակիր լուսանկարը։