«ՀայՖեստ»–ն ամփոփել է արդյունքները

ՀՀ մշակույթի նախարարության և Հայաստանի երիտասարդական հիմնադրամի աջակցությամբ՝ ս. թ. հոկտեմբերի 2-9-ը Երևանում անցկացվել է «ՀայՖեստ» 10-րդ միջազգային թատերական փառատոնն, որը կրում էր «Բաց մի թողեք» խորագիրը: Փառատոնին մասնակցում էին 18 երկրի /Ֆրանսիա, Պորտուգալիա, Էստոնիա, Ճապոնիա, Իրան, Վրաստան, Ուկրաինա և այլն/ 25 թատերական և պարային խմբեր, շուրջ 200 մասնակից և հյուր՝ միջազգային փառատոների ղեկավարներ և պրոդյուսերներ:

Այս տարի հայկական թատրոններից փառատոնին իրենց մասնակցությունն են բերել «Միհր» թատրոնը, Հովհ. Թումանյանի անվան պետական տիկնիկային թատրոնը, Փոքր թատրոնը և Երևանի պատանի հանդիսատեսի պետական թատրոնը: Փառատոնի բազմաժանր՝ դրամատիկական, երաժշտական, պարային ներկայացումներն ընդգրկված էին հիմնական, ազատ, ուսանողական, տիկնիկային և մանկական ծրագրերում: Ուշագրավ էր ուսանողական ծրագիրը, որտեղ ներգրաված էին լավագույն ուսանողական և երիտասարդ ռեժիսորների ներկայացումներ:

«ՀայՖեստ»-ի շրջանակներում միջազգային փորձագետների կողմից անցկացվել են վարպետության դասընթացներ: Տասը տարիների ընթացքում «ՀայՖեստ» փառատոնին իրենց մասնակցությունն են բերել ավելի քան 1500 մասնակից շուրջ 50 երկրից, այդ թվում՝ Ռուսաստանից, Անգլիայից, Շվեդիայից, Գերմանիայից, Շվեյցարիայից, Ավստրիայից, Հունգարիայից, Բելգիայից, Ֆինլանդիայից, Բուլղարիայից, Սլովենիայից, Չեխիայից, Սինգապուրից, Հնդկաստանից, Հոլանդիայից, Իսպանիայից, Իտալիայից, Իրանից, Իսրայելից, Ղազախստանից, ԱՄՆ-ից, Ճապոնիայից և այլն: Փառատոնն իրենց մասնակցությամբ պատվել են արտերկրի ավելի քան 150 հեղինակավոր արվեստագետներ, արտ մենեջերներ, միջազգային փառատոների նախագահներ և թատերագետներ: «ՀայՖեստ» փառատոնն այժմ իր հաստատուն տեղն է գրավում ԱՊՀ երկրների հեղինակավոր փառատոների շարքում: ՀՀ մշակույթի նախարարությունում ս. թ. հոկտեմբերի 10-ին, ժամը 12:00-ին, «ՀայՖեստ» փառատոնի ամփոփիչ ասուլիսին մասնակցում էին ՀՀ մշակույթի նախարարության ժամանակակից արվեստի վարչության գլխավոր մասնագետ Վարդան Գրիգորյանը, «ՀայՖեստ» փառատոնի նախագահ Արթուր Ղուկասյանը: